Dili – Ohin,  20 Dezembru 2020, oratorianu/a Ceferino Namuncurá sentru B no sentru E, Comoro-Dili, hamutuk ho Infansia Missionaria sira ho laran ksolok no domin hodi konsentra hamutuk iha sentru E, simu Madre Diretora Me. Jacinta Gusmão FMA ba dala uluk iha sentru oratorio, ho dansa kultura no hananu welcome nian ida. Eventu hanesan, ami kumprimenta madre boot ho ba festa boot natal nian ho atraksi; dansa, kanta no drama kona ba Jesus nia moris, ne’ebe oratoriano no Infansia Misionario sira prepara ona hodi kumprimenta malu liu liu kumprimenta Me. Jacinta no Irmán sira hotu.

Atraksi taka ho mensajen badak husi Me. Jacinta hodi hahú ho pergunta ida: se mak ohin iha drama sai bibi? Labarik sira foti liman. Madre dehan Ita ida-idak presiza foti simbólu ida iha prezepiu ne’ebe sai hanesan ita, ezemplu: fitun, bibi, karau nst, atu ita bele sai prezente furak ida ba Jesus. Hanesan istória haktuir: iha loron ida, ema hotu preukupa lori prezente ba Jesus kosok oan iha prezepiu maibe iha labarik ida ne’ebe la lori nia prezente, wainhira nia to’o iha Jesus nia oin, Nain Feto fo Jesus kiik-oan ba nia kous, no entre ema hirak ne’e, labarik ne’e mak hetan sorte boot liu tanba nia kous Jesus. No imi labarik ida-idak bele sai mós Jesus kosok oan ba imi nia familia iha uma. Ho ita nia preparasaun ba festa Natal nian, mensajen ne’e hakarak sadik ita atu hadai ita nia moris no hili simbólu sira prezepiu nian ba ita nia moris hodi saim prezente furak ida ba Jesus iha tinan foun be sei mai.

(sr. Onesiana ho animadora Vitoria)