Maubara, 13 Dezembro marka Istoria iha oratoriano Sentru Oratorio São João Paulo II Tasi Tolu-Bairo da Paz nian. Sira hamutuk ho animadores, kolaboradores, Irmán Novisa no Madre sira halao reflesaun halo reflesaun hamutuk preparasaun ba Festa Natal, festa agradesemento oratorio nian ba tinan 2020 no iha tempo hanesan selebra Natal hamutuk, tamba tempo limitadu tebes borong atividade hotu dala ida.

“Agradese mak sinal rekoñese Maromak Nia servisu iha ema nia moris”. Tan ne’e iha reflesaun ne’ebe Me. Esmeralda, Diretora no Maestra Novisa nian hato’o ba oratoriano sira, Madre dehan: “ ohin semana datoluk tempo Advento nian, katak Tempo Ksolok nian. ita tenke haksolok tamba tempo Natal besik. Nune’e ita tenke prepara-an atu Jesus mai moris iha fatin ne’ebe diak. Ita prepara-an oinsa? Ita presiza para ituan husi ita nia atividade lor-loron nian, hakmatek ituan atu hateke fali ba ita nia moris hori hare ita nia hahalok sira lor-loron nian ne’ebe ita halao ona. ita hare fali hahalok diak sira ne’ebe ita konsege halo ona, hodi agradese Maromak no hare hahalok a’at sira ne’ebe ita halo ba malu no la tulun ita atu moris diak, ita husu perdaun ba Maromak no ba malu hodi haka’as-an atu la halo tan. Nune’e mos iha tinan tomak ita hamutuk iha oratorio, ita agradese Maromak ba grasa ne’ebe ita simu husi malu no husu perdaun ba malu hahalok sira ne’ebe la diak ne’ebe sira halo ba malu ona. Hanesan Dom Bosco dehan ita tenke sai sarani diak no sidadaun onestu. Ita presiza presiza haka’as-an lor-loron atu bele moris tuir liafuan sira ne’e. ne’e mak hahalok sira ne’ebe tulun ita atu prepara ita fuan atu Nai Jesus bele mai hela iha tempo Natal”.

Oratoriano sira mos aprezenta Drama kona ba “ Joven Ida Nia Mehi”. Ne’ebe konta kona ba joven ne’ebe mehi Jesus mai no promete atu mai vizita nia, maibe nia la interese. Nune’e loron tomak nia la prepara-an atu simu Jesus ne’ebe mai liu husi ema sira ne’ebe presiza nia tulun. Nia preokupa liu ho ba ransu ho kolega sira hodi halimar PUBG, hemu tua no tur iha dalan ninin. Iha kalan Jesus mai fali iha mehi hodi dehan ba nia katak Jesus triste los tan joven ne’e la simu Nia. Joven ne’e dehan ba Jesus hodi promete nune’e: ‘Deskulpa Nai Jesus, hau promete atu la halo tan hanesan ne’e. Hau mos sei dehan ba hau nia kolega sira atu labele halo hahalok hanesan ami ohin halo. Hau sei dehan ba sira katak Nai Jesus sei mai hanesan ema kiik, kiak no sira ne’ebe hakarak ita nia diak.’ Atu dehan katak uluk Jesus mai moris iha mundo iha bibi luhan, Jesus hasoru uluk ema kiak sira. Sira mak bibi atan sira, iha mos ema mai husi fatin do’ok, Liurai nainn tolu. Hahalok sira ne’e atu hatudu Maromak Nia Gloria Liu husi ema kiak no lao rai sira”.

Obrigada ba ita nia hamutuk durante tinan 2020 no mai ita prepara-an didiak atu simu Jesus ne’ebe sei mai iha Tempo Natal no tinan foun 2021.

(Noemia de Deus FMA)