Venilale –  Ohin 11 Dezembru, ho fuan nakonu ho ksolok no domin ami komunidade Madre Mazzarello hamutuk ho komunidade edukativa no menina internatu, simu ami-nia diretora foun komunidade nian; Ir. Carolina Maria Correia FMA, maske nia horik ona iha komunidade ida ne’e. Komunidade simu ho ksolok liu husi dansa Tebe-Dai husi menina internatu no ho knananuk Benvindu nian ba Ir. Carolina ne’ebé akompaña husi Inspetora Ir. Alma Castagna FMA. Iha momentu orasaun nian, Inspetora hateten ba komunidade tomak; ” Ohin Ir. Carolina sai imi nia diretora komunidade nian, nia prezensa sai sinal domin Maromak nian ba imi hotu, hodi serbi ho domin hanesan Kristu. Atu sai sinal domin Maromak nian ba malu, presiza mos la’o hamutuk iha buat hotu, hanesan imi-nia kantu ne’ebé imi foin hananu, Insieme è Più Bello/ hamutuk mak furak liu, nune’e bele harii Maromak nia reinu liuliu halo tuir Maromak nia hakarak”. Hafoin Inspetora entrega simbolu Uma Mornese nian ba Ir. Carolina. Uma ne’ebé sai uma domin Maromak nian ba ema hotu, uma ksolok no esperansa nian ba foinsa’e sira. Boa misaun Ir. Carolina.

(Alice Filipe FMA)