Venilale – Iha loron 10 Dezembru, komunidade Madre Mazzarello ho nia komunidade edukativa no ho staff  Klinika Maria Auxiliadora nian, hala’o seremonia inagurasaun ba tanki bee nian ne’ebé uza atu fase liman. Tanki rua (2) ne’e suporta husi CRS – Catholic Relief Services no Caritas Diocese Baucau. Tanki ida ho litru 1100, lokaliza iha klínika Maria Auxiliadora no tanki ida seluk ho  litru 5000 lokaliza iha eskola ETV nia oin. Objetivu husi apoiu ne’e mak nu’udar fasilidade no ekipamentu ida ne’ebé uza hodi fase liman beibeik atu prevene moras COVID- 19 no moras sira seluk ne’ebé bele daet bazeia ba saúde mundial nia rekerimentu.

Serimónia inagurasaun ne’e realiza iha prezensa, reprezentante diretor CRS Baucau Sr. Alberto dos Reis Freitas no diretór Caritas Diocese Baucau, Pe. Mario de Carvalho. Aleinde ne’e, prezente mos lider komunitaria sira; reprezentante chefe postu administrativu Venilale, chefe suku watu-haco, polisia esguarda, reprezentante inan-aman, mestre/a no alunos sira ne’ebé eziste iha Venilale.

Iha momentu agradesimentu nian, Ir. Carolina Maria Correia, FMA agradese tebes ba organizasaun CRS no Caritas ne’ebé suporta ona klinika no eskola nu’udar komunidade ida deit ho tanki bee nian no sasán sanitaria sira seluk. Nune’e mós lider komunitária no reprezentante CRS no Caritas nian agradese ba irmán sira FMA Venilale, ne’ebé ho sakrifisiu no dedikasaun tau matan ba povu Venilale no povu sira seluk ne’ebé mai halo konsultasaun iha klínika ida ne’e. Maske klínika ne’e kiik, maibé sira laran metin no fiar iha madre sira nia ai-moruk no dedikasaun, tanba ne’e sira hakarak mai konsulta iha fatin ne’e.

Depoizde serimónia inagurasaun nian kontinua ho animasaun no dansa husi aluna ETV no labarik kiik sira iha pátiu koléjiu nian, hafoin halo konfraternizasaun hamutuk nu’udar família.