Fuiloro, 09 Dezembru loron Graduasaun ba menina Kursus Computer hamutuk  53 e Kostura 5. Total Graduada sira hamutuk 58 ne’ebé hamahan an iha Sentru Formasaun Fuiloro kuaze tinan ida nia laran.

Molok atu halo graduasaun, menina kursus sira prepara espiritualmente ho retiru no konfisaun husi Padre Transfiguração Antonio Pinto, SDB sai pregadór ba sira hodi ko’alia kona-ba dokumentu Amu-Papa nian “Fratelli Tutti” no oinsá moris iha mundu serbisu nian ne’ebé nakonu ho dezafiu oioin ne’ebe husu sai madura liután iha fiar sarani no moris ne’ebe fó an atu serbi.

Madre Alma Castagna Sai nu’udar mós Diretora Jeral do Kursu, hato’o Nia mensajen kona ba Kursus ida ne’e, ne’ebé  hakaas an atu oferese Formasaun ida ne’ebe iha kualidade ne’ebé favorese kompetensia. Madre mós agradese ba ajénsia sira hanesan SEPFOPE & INDMO ne’ebe fó konsellu ou sujere hatudu dalan atu bele nafatin lao ba oin hodi hatán ba mundu serbisu nian. Husi parte seluk husu ba graduada sira, se imi aprende didi’ak  maibé laiha kapasidade atu adapta an no lahatene fó prioridade saida mak tenke halo uluk  kursus ne’e hatudu falla kedas. Tempu ida ne’e fó hanoin ba imi buat ruma tenke dezenvolve no ema labele fó ba imi. Tanba posibilidade no kriatividade mai husi ema ida-idak, tan ne’e husu atu dezenvolve an bebeik. Keta hakmatek ho buat ne’ebe imi estuda iha ne’e, tanba mundu la’o ba oin iha koñesimentu foun, tan ne’e husu nafatin buka dalan foun ida ou di’ak ida, ne’e mak Aguriu ou votos ida ba imi graduada sira.

Iha Seremonia ne’e Diretor Jeral SEPFOPE, Sr. Paulo Alves hato’o mós mensajen badak ba graduada sira katak presiza nafatin hadi’ak kualidade Sentru Formasaun sira  hodi hatán ba industria nia presiza. Sertifikadu ne’ebé imi atu simu sai dezafiu ida ba imi atu hasoru mundu globalizasun ohin loron, tanba mundu ohin loron ne’e lafasil ida. Husu ba graduada sira wainhira remata tiha Kursus ne’e aplika imi nia matenek hotu ba mundu serbisu nian.

Liu fuan badak mós husi Reprezentante INDMO, Sr. Arlindo da Costa ne’ebe ko’alia kona-ba INDMO nia papél fó garantia ba kualidade husi Formasaun sira  husi Sentru Formasaun ne’ebé ninia valór mak benefísiu husi kualifikasaun sira ba imi ida-idak.

Ikus liu fahe Sertifikadu ba Graduada 58 ne’ebe ohin remata sira nia Kursus iha Sentru Fuiloro e taka ho almosu hamutuk nu’udar família ida.

 

(Ines Bartolo FMA)