KOMUNIDADE S JOÃO BOSCO SIMU DIRETORA FOUN

Dili – Iha Solenidade “Maria Imaculada da Conceição,” komunidade ida ne’e simu prezensa Sr. Maria Angelita Gomes nu’udar diretora foun ne’ebé akompanha husi Madre Provinsial, Madre Alma Castagna no Sr. Maria Dolores.

Komunidade simu ho ksolok hodi hato’o liafuan bemvinda, dansa kultura husi menina asrama no orasaun badak. Iha Madre Provinsial nia liafuan, hateten: “Sr. Angelita ba dala rua tama iha komunidade ne’ebé la hanesan iha Festa Na’i-Feto Imakulada, komunidade Beata Laura Vicuña-Laga no ohin Komunidade Balide. Karik Na’i-Feto hakarak husu buat ruma ba nia…”

Hafoin Madre Provinsial entrega simbolu Uma Mornese nu’udar sinal karakteriza komunidade dahuluk ne’ebé simu no permite ba ema ne’ebé hakbesik no dehan katak “ida ne’e mak uma domin Maromak nian.” Hanesan Madre Mazzarello ne’ebé rona Nain Feto nia lian iha Borgo Alto, “Ha’u entrega sira ba ó.” Nune’e mos Sr. Angelita hahu nia misaun foun iha Komunidade ida ne’e.

Hamutuk ita manifesta Maromak Nia domin ne’ebé bolu ita hamutuk, hodi sai gia no mediadora mai ami atu besik liutan ba Maromak.

Bem-vinda no Boa Misaun Sr. Angelita