Dili – Iha loron 27, Novembru 2020, mak loron despedida ba Me. Domingas da Costa, FMA no Me. Ermelinda Almeida, FMA ne’ebe simu ona obediensia atu ba komunidade seluk. Despedeida ne’e halao iha Komunidade São José Komoro-Dili. Me. Domingas sei muda ba Komunidade B. Laura Vicuña-Laga no Me. Ermelinda sei muda ba Komunidade B. Eusebia Palomino-Komoro. Sinal agradesimentu nian hato’o liu husi: Selebrasaun Eukaristia, orasaun Tersu animado no kalan agradesimentu nian ho drama no kantu  sira.

Espirito Familia,forsa kriativa ne’ebe suli husi Dom Bosco nia fuan. Nu’udar familia ida ita agradese ba moris fraterna ne’ebe ita halao hamutuk  durante ne’e ho Madre nain rua. Ita agradese ba sira disponibilidade atu halo tuir Maromak Nia hakarak, agradese ba sira nia sakrifisiu ne’ebe la sura kole, agradese ba domin ne’ebe sira fo hodi la hein atu simu fali, agradese ba sira nia ksolok  fraternal iha komunidade no misaun, agradese ba sira nia sasin orasaun nian no laran metin nafatin iha Maromak nian. durante moris hamutuk sira hatudu sira nia moris hanesan músika ida ne’ebe komposta husi nota oi-oin, iha nota balu ne’ebe tun, iha nota balu ne’ebe sae ne’ebe halo ita lian la to’o atu hananu. Maske nune’e wainhira tau hamutuk mak sai knananuk agradesimentu nian ida ba Maromak. Doce ne’ebe midar no presentable mak ida ne’ebe iha ingridentes kompletu no iha sasukat ne’ebe los. Presiza trigu servi nian, masin midar ksolok nian no fermentu pasiensia nian mak bele prepara doce domin nian ba ema hotu. Jardin mak fatin furak atu kontempla Maromak Nia maravilha. Wainhira hahu ain hakat sira tama iha jardim laran, fuan haksolok tan hare aifunan kor oi-oin. Sente mos triste hare aifunan balu ne’ebe hahu namlaek no ular oan sira han. Mosu laran manas atu tau matan ba sira hodi rega ho be’e generosidade nian no tau tan adubu badinas nian. aifunan  sira nia furak iha jardim mak sinal agradesimentu ne’ebe laiha rohan.

Madre nain rua mos hato’o sira nia agradesimentu profundo ba komunidade no la haluha husu deskulpa ba falhansu balu ne’ebe ho ema nia frakeza hatudu sai ona. ikus liu fo rekordasaun ba malu no hananu knananuk agradese nian ba malu. Agradese ba diak hatu ne’ebe fo no simu durante moris hamutuk. Obrigada barak Madre nain rua, Maromak fo bensaun no tulun wain iha fatin foun ne’ebe ita bo’ot  sira ba.

Obrigada, Grazie, Thank you, Gracias, Terima kasih.

Ir. Noemia de Deus