LABORATORIUM BADAK KONA-BA MADRE MAZZARELLO TEMA : H”A’U ENTREGA SIRA BA Ó”

Ohin loron 15/11/20, animadora hamtutuk ho Irmán sira halo laboratorium badak konaba MM nia moris, husi laboratorium badak ida ne’e ho intensaun tulun labarik sira atu koñese liutan ita konfundadora nia moris, iha tempu hanesan nu’udar Oratorianu ami sente iha obrigasaun atu hatene MM nia moris no sensu hola parte ba Ispetoria no Istitutu.

Iha laboratorium ne’e ami aprezenta istória badak konaba fatin interesante sira iha MM nia moris.

Mornese : hakle’an konaba ninia familia, serbisu hodii tulun nia papa iha toos uvas nian, nia mak feto badinas ne’ebé halo mane sira sai hakfodak nia, iha uma nia la kole atu tulun nia alin sira no halo serbisu sira uma nian. (nov. Laura)

Valponasca : Fatin ne’ebé Maria aprende atu sai metin liutan ho Maromak liuhusi Orasaun no Servisu, Kontempla Jesus iha Sakrariu liu husi Janela. “Se iha minutu 15 nia laran mak ha’u la hanoin hetan Maromak, ha’u tenke ba konfessa”. (Nov. Adelaide & animadora Teresa)

Vizaun Borgoalto : bainhira Maria di’ak tiha husi moras tifu nia laiha tan ona kbiit hanesan uluk atu halo serbisu iha toos no mos serbisu uma laran nian, MM deside hodi la’o oituan atu bele rekupera nia saude, nune’e MM la’o iha foho Borgoalto nian hodi hanoin hela saida mak nia sei bele halo iha momentu ne’e. Derepente hare vizaun ida, iha vizaun ne’e nia rona lian ida ne’ebé dehan : ” HA’U ENTREGA SIRA BA Ó”. Lian ida ne’e kontinua desturba MM no to’o ikus mai MM nia mehi atu tau matan ba foinsa’e ki’ak sira hodi hanorin sira atu hadomi Maromak sai realidade duni. (ir. Honória & animadora Eviana)

Casa Imaculada: liu tiha tinan ne’ebé Maria hetan moras “TIFU” nian, ho nune’e Maria la lakon nia esperansa hodi loke tan sala kustura nian ba labarik sira ne’ebé lakon sira nia inan-aman, bainhira Maria hanorin kustura nia hahú mós halo katekeze ba labarik sira. MM nafatin repete ba labarik sira dehan: “Pontu ida-idak mak aktu domin nian ba Maromak”. (nov. Silvia & animadora Giovania).

Remata tiha laboratorium iha kuis badak hodi husu sira konaba MM nia moris, , no parte ida ne’ebé sira gosta liu. Nune’e sira hotu hatanpergunta ho entuziasmu liu. Sira ne’ebé hatene hatan pergunta ho di’ak hetan prezente simples ne’ebé ami prepara ona. Mensajen ikus nian ne’ebé MM fó ba sira mak : hadomi serbisu no Jesus iha Eukaristia.

(Honoria Santos FMA)