Knaar edukativu maka sentru misaun saleziana feminina. FMA ida-idak hatene katak nia moris saran tomak ba Maromak no ba foin-sa’e sira, hodi buka kualifika ninia prezensa liuhusi intervensaun sira ne’ebé adekuada ba realidade kontemporánea.

Ho eskola, husi tipu no grau hotu, irmán sira hatán ba ohin-loro nia ejizénsia ba edukasaun sistemátika, ba formasaun krítika no, iha nasaun barak, fó posibilidade ba foin-sa’e sira husi klase populár, atu manán instrumentu sira nune’e bele tama iha sírkulu kultura nian.

Kursu formasaun profisionál, esprime atensaun saleziana ba mundu serbisu nian no ba foin-sa’e sira nia nesesidade atu tama ho kompeténsia espesífika iha sírkulu produsaun realidade sosiál nian.

Oratóriu, intuisaun saleziana ne’ebé edukativa duni tanba valoriza foin-sa’e sira nia kbiit potensiál, soi nu’udar objetivu dahuluk promosaun umana iha rai kiak sira, enkuantu iha kontestu industrializasaun nian buka atu hatán ba hahusuk boot foin-sa’e sira nian iha tempu livre. Agregasaun juveníl, ho nia hahusuk kle’an sira, kontinua sai dezafiu boot edukasaun nian.

Obra ba labarik sira, adolexente, foin-sa’e sira iha situasaun risku nian. Komunidade alojamentu, sentru sasimuk nian, “case famiglia” (uma ho estrutura hanesan família) liuhusi dalan ida ne’ebé iha nu’udar pontudepartida situasaun konkreta destinatáriu sira-nian, sira-nia kondisaun frajilidade nian, kondisaun abandonu nian buka atu lori ema ne’ebé kanek ba liberdade no maturidade.

Edukasaun ba feto-raan sira mak hilin prioritária ida liuhusi intervensaun oioin: promosaun kooperativa ba feto sira iha misaun, rekupera foin-sa’e feto sira ne’ebé iha periferia sidade boboot nian sai vítima prostituisaun nian, insersaun iha serbisu, to’o halo inisiativa kulturál no apoiu  nian atu feto-raan sira ho konxiénsia hatene luta ba dignidade rasik no ba elaborasaun kultura ida ne’ebé respeita feto nia kontribuisaun.

Uma espiritualidade nian ba foin-sa’e sira. Obra ne’e oferese ba jerasaun foin-sa’e posibilidade atu koko dalan silénsiu nian no kontaktu kleur no hakmatek ho natureza no ho Maromak nia liafuan ne’ebé fó moris.

Misaun “ad gentes”