Dili – Iha loron 14 Novembru, Irmán perpétua sira halibur hamutuk iha Comoro halo enkontru ho Provinsiál, Ir. Alma Castagna FMA, iha komunidade S. José, Dili.

Iha enkontru ne’e Irmán Superiora aprezenta dokumentu “KOLÓKIU PESOÁL”. Kolókiu liman-rohan Fundadór/a sira Don Bosco no Madre Mazzarello nian ne’ebé husik hela no sai identidade Filhas de Maria Auxiliadora nian. Servisu kona-ba kolókiu mak mandatu ida husi Kapítulu  Jerál XXIII ba Ámbitu formasaun. Iha Kapítulu jerál XXIII  temi kauza ruma kona-ba ladún valoriza elementu importante tradisaun saleziana, katak kolókiu. Mosu interrogasaun hanesan “oinsá halo atu moris tuir ita-nia espiritualidade, hodi foka kona-ba dalan konkretu kona-ba tema ne’e”.

Nune’e mak husi Ámbitu formasaun halo kuestionáriu online ba survey kona-ba prátika kolókiu pesoál.  Ámbitu refere estuda no rona realidade husi irmán ida-idak iha Institutu durante tinan lima nia laran. Objetivu atu fokaliza valór sira ne’ebé sai importante iha kolókiu; Identifika motivu sira ne’ebé ita husik; Asumi fali nu’udar elementu esensial iha FMA nia moris; Propoin la’o dalan.

Kolókiu pesoál mak elementu konstitutivu vida konsagrada saleziana, “fatuk-murak” ita-nia Família relijioza. Kolókiu pesoál mak momentu privilejiadu hasoru malu nian no momentu atu deskobre Maromak nia hakarak ba ema ida-idak, sai patrimóniu karizmátiku ne’ebé la bele halakon no sai formasaun permanente iha FMA nia moris. Kolókiu pesoál ne’e  ninia sujeitu mak FMA hotu: diretora no Irmán sira komunidade nian, no halo ho regulár no frekuénsia. Kolókiu ne’ebé jenuinu no loos sai AKOMPAÑAMENTU RESÍPROKU tanba favorese Irmán sira nia maturasaun iha estasaun/idade ida-idak moris nian no tulun atu halo ho profisionalidade no efikásia knaar ne’ebé entrega ba foin-sa’e sira nia edukasaun.

Iha enkontru ne’e, iha mós momentu reflesaun hodi haree fali esperiénsia KOLÓKIU nian iha ema ida-idak. Irmán sira hotu kontente ho dokumentu ida ne’e no sei haka’as an atu asume sai identidade karizmátika ne’ebé presiza tebes atu haburas no kuda iha nia an.

(Alice Filipe FMA)