Dili – Iha loron 7 novembro, iha Eskola Maria Auxiliadora realiza Graduasaun ba Pré-Escolar Turma B1 e B2  ho total alunos hamutuk nain 77; Feto nain 41 no mane hamutuk nain 36.

Iha graduasaun ne’e ambiente sai furak liu no nakonu ho ksolok esperansa nian tamba, partesipa husi Irmãs sira, Manorin hotu Pré-Escolar no Ensino Básiku nian, Inan-Aman no familiares sira no reprezentante husi Ministério Edukasaun nian: Vice Ministro da Educação, Juventude e Desporto, Sr. António Guterres, Diretor Geral EPE – EBR Sr. Apolinário Serpa Rosa, Diretor Nasional Pré-Escolar, Sr. Manuel Belo Soares, Diretor GFPC-INFORDEPE, Sr. Manuel Magno Atoc, Diretor da Educação Municipio de Dili, Sr. Duarte Bragança, Chefe Sec. Pré-Escolar Municipio de Dili, Sr. Miguel dos Santos. Hodi prezente iha serimonia ida ne’e, sira bele haree no  tuir besik liu tan realidade Eskola nian, no mos tamba, Escola Maria Auxiliador mak escola primeiru nebe realiza graduasaun iha ano letivo eskolar 2020. Prezente mos iha cerimonia ne’e ir. Maria Dolores, FMA (Missionaria foun) no Madre Vigaria Provincial FMA, Me, Sebastiana da Costa, FMA.

Iha cerimonia, iha mos diskursu husi Me. Sebastina Da Costa, FMA (Vigaria Provincial FMA) nebe hatoo nia liafuan Bemvindo ba Bainaka sira no aprezenta uitoan situasaun no aktividades sira nebe realiza iha eskola ida ne’e no taka ninia diskursu hodi fo Parabens ba alunos graduado sira no agradese ba pessoa ida-idak nebe fo sira nia kontribusaun atu alunos sira bele too iha etapa ida ne’e.

Senhor Vice Ministro, iha nia diskursu, nia rekonhese eskola nia dezenvolvimentu no apresia tebes ba labarik sira nia presentasaun tamba, labarik sira hatudu duni sira nia abilidade ne’ebé diak no prontidaun atu tama ba 1º ano Ensino Basico. Senhor  mos hato’o nia Parabens ba Alunos graduadu sira, Professores  no Irmãs sira nia dedikasaun maksimu hodi dezenvolve Eskola ho diak tebes. Maske tinan ida ne’e iha situasaun emerjensia de distansia tamba Pandemia Covid-19 ne’ebé hamosu ferias barak hodi interrompe prosesu aprendizajem nian iha eskola maibé, eskola kontinua esforsu-an atu la’o ho diak tuir Kurrikulum ne’ebé iha hodi mantein disiplinas hotu ne’ebé Governo Timor-Leste fó sai. No  iha tempo hanesan labarik sira aprende diak duni to’o realiza sira nia Graduasaun.

Cerimonia taka ho liafuan agradese nian husi Ir. Suzana Alves, FMA (Diretora da Escola).

Durante cerimonia, iha mos programa oin-oin hanesan: Aprezentasaun Kanta, Dansa, Teatro no poesia husi Graduados no Pre-Escolar turma A, nebe halo partesipantes sira partesipa ho ksolok no la sente kole.

Parabens aos Graduados

 

Ir. Zelia Matos, FMA