Dili- Ho ksolok bo’ot irmán juniora sira hamutuk nia 19 halibur hamutuk hodi hala’o enkontru ho madre Alma Castagna hahú dadeer tuku 09.35-15.00 lorokraik iha sentru João Paulo Comoro, iha loron 7 Novembru 2020.

Iha enkontru ne’e madre Alma aprezenta mai ami livriñu foun ida ne’ebé elabora husi Sentru/Institutu ho ninia tema “kolókiu pesoál” ne’ebé tuir konstituisaun FMA artigu 34 dehan: kolókiu mak momentu privilejiadu atu hakbiit komuñaun, deskobre Maromak nia hakarak no haklean vida pratika…. no Don Bosco dehan: kolókiu mak elementu troka laek” liman rohan karismatika atu deskobre fali no fó valor no pratimoniu karismatiku. Durante enkontru madre Alma aprezenta livriñu ne’e ninia konteudu liu husi power point: hahú husi aprezentasaun madre Jeral nian ne’ebé subliña oinsa Don Bosco no Madre Mazzarello fó importansia ba kolókiu; introdusaun, kolókiu nia karateristika lolos no ninia finalidade; livru ne’e kontém kapitulu 4 no husi kapitulu 4 ne’e madre aprezenta ona kapitulu 3, kapitulu seluk sei aprezenta iha enkontru tuir mai.

Iha enkontru ne’e ami halo dinamiku grupu hodi fó definisaun ida kona ba kolókiu baseia ba Konstituisaun FMA, Lome, Projetu formativu junioradu no mos fahe ida-idak nia esperiénsia kolókiu nian husi perguntas: “saida mak imi esperimenta ona durante kolókiu pesoál ne’ebé hala’o fulan-fulan? Iha asembleia irmán balun fahe sira nia esperiénsia hodi dehan: “ iha kolókiu pesoál ne’ebé halo laos atu hetan kedas solusaun ba problema/difikuldades ne’ebé hasoru maibé buka Maromak nia hakarak atu sai buras iha identidade pesoál no komunitária iha moris konsagrada salesiana liu husi akompañamentu ne’ebé irmán simu husi ninia diretora.

Molok remata enkontru ami juniores agradese madre Alma ne’ebé aprezenta ona livriñu ida ne’e, ne’ebé halo ami komprende dalan no maneira lolos atu halo kolókiu atu bele buras iha identidade pesoál, komunitaria no karismatika iha lao dalan ba konfigurasaun ho Kristu.

Obrigada barak!

(Cearina Marques Correia FMA)