Goiânia de Aparecida (Brasil) – Fulan Outubru mak fulan ne’ebé igreja dedika ba misaun. Ohin, 27  Outubru dader tuku 8.00 – 12.00 iha ami nia “centro juvenil padre Giovanni Pini”, irmán no edukadór/a iha retiru ne’ebé prepara husi Irmán Maria do Socorro ho tema “A vida é missão”.

Preparasaun furak. Ida-idak mai ho Bíblia, reflesaun no símbolu sira ne’ebé iha relasaun ho pasajen leitura bíblika ne’ebé Irmán haruka ba sira liuhusi online. Parte seluk furak tebes tamba molok atu hasoru malu  sira halo hamutuk ona ho sira nia família hodi halibur malu hodi lee, fahe malu esperiénsia reál iha sira nia moris,  hodi haree Maromak nia presenza iha sira durante tempu pandemia. Tamba iha balun hetan moras covid maibé rekupera, ida nee hanesan milagre no grasa boot.

Sira fahe ho emosaun hodi fiar no rekoinese  Maromak nia Domin, laran di’ak no mizerikórdia. Atu espresa sira nia ksolok hasoru malu, iha loron ne’e sira hariis iha pixina. Oportunidade ba sira ruma ne’ebé mai ho oan hodi haksolok hamutuk. Remata ho konfraternizasaun.

Irmán Isabel Da Silva Gomes, FMA (misionária iha Brasil )