Venilale – Oratóriu mak naran ba Don Bosco nia obra hotu. Iha koordenada esensiál haat kona-ba oratóriu. Oratóriu mak uma ne’ebé simu; oratóriu mak parókia ne’ebé evanjeliza; oratóriu mak eskola ne’ebé hatama foin-sa’e ba moris, tulun sira sai sidadaun onestu; oratóriu mak pátiu atu hasoru belun sira no moris iha ksolok.

Oratóriu festivu dominikál mós foti koordenada haat ne’e. Bainhira animadór/a sira oratóriu nian ba fatin sira periferia nian, sira organiza oratóriu tuir koordenada haat ne’e. Iha oratóriu iha jogu sira, divertimentu oioin, halo teatru, dansa… ne’e hotu atu moris espíritu família, kria amizade, sai fatin ba espresaun ksolok no amizade.  Desportu, múzika, teatru, jogu seluk mak momentu divertimentu nian, maibé mós instrumentu formasaun ba valór umanu sira, halo foin-sa’e sira ativu, favorese koñese malu no amizade, treinu ba kolaborasaun no sakrifísiu konstrutivu.

Oratóriu moris husi katesizmu ida, no ne’e mak misaun prioritária ba Don Bosco: nunee mak iha oratóriu iha mós katekeze, haklaken Evanjellu Ksolok nian, instrusaun relijioza, prátika sakramentál, selebrasaun no hahí, haburas devosaun ba Maria.

Iha fulan Rozáriu ne’e, animadóra/a sira iha oratóriu Berkoli fasilita vizita Na’i-Feto nian ba oratorianu/a sira ne’ebé hakarak simu iha uma. Labarik ki’ik-oan haksolok tebes. Sira hakarak lori Maria ba sira-nia uma, no sira sai evanjelizadora ba sira-nia família rasik. Maski família dehan la prontu atu simu Na’i-Feto, labarik ida insiste lori Maria ba nia uma ba semana ida no iha tempu semana ida, nia lori membru balun ba sakramentu konfisaun… Na’i-Feto nia vizita lori mós konversaun. Ida-ne’e hatudu tebes katak labarik mós bele sai evanjelizadór/a ba ninia família rasik, hanesan Beatu Carlo Acutis lori nia inan no aman ba Maromak liuhusi ninia sasin, ninia ezemplu, ninia fiar, esperansa no karidade.

(JG)