Venilale – Obra ida ne’ebé komunidade Madre Mazzarello iha mak “klínika” ka “ambulatorio” Maria Auxiliadora, ne’ebé fó tratamentu saúde ba moras (kurativu) sira iha Venilale no ninia arredór sira, katak li’ur husi territóriu Venilale. Maibé pesoál sira klínika nian la fó de’it tratamentu. Sira mós fó formasaun kona-ba saúde (prevensaun) ba eskola sira no estasaun misionária bainhira bele ka hetan konvite. Nune’e mak, husi loron 13-14 Outubru 2020, dr. Marcelino no Ir Carolina fasilita formasaun kona-ba “Primeiros Socorros” ba turma rua Primeiro Ano nian, Escola Técnico-Vocacional Hotelaria e Turismo.

Sá loos finalidade “Primeiros Socorros” nian? Finalidade “Primeiros Socorros” mak: 1 – Atu tau matan ba moris hodi bele salva; 2 –  Atu proteje vitima nebe lakon sentidu/desmaia; 3 – Atu prevene kondisaun nebe aat liu no hamenus terus; 4 – Koko fó tratamentu.

Bainhira iha asidente ruma ba sokorista sira tenke domina lalais situasaun & prevene perigu mate nian, liuliu hodi tau atensaun tuir prinsípiu tuir mai hanesan A – via respiratória; B – “respirasaun”,; C – sirkulasaun se iha emorrajia ka raan fakar no “estadu shock nian”.

Iha aprezentasaun ba estudente sira, tópiku sira ne’ebé doutór Marcelino fó iha haat: emorajia tan kanek, emorajia husi inus, keimadura tan kontaktu ho manas hanesan bee nakali no ahi lakan no ikus ain naksalak ka luksasaun, ne’ebé iha ligasaun liu ba sira-nia área estudu nian, katak “Restaurasaun”,”Produsaun ai-han”.

Buat importante mak prevene asidente. Asidente servisu nian mak asidente ne’ebé akontese iha fatin servisu nian no tempu servisu nian no hamosu kanek iha isin ka perturbasaun funsionál, moras, mate no lakon produtividade iha servisu.

Alunu sira halo mós prátika ruma oinsá tulun maluk ne’ebé hetan asidente sira tuir tópiku sira iha leten. Sesaun ne’e halo ba oras rua nia laran.

(JG)