Venilale – Loron 13 Outubru aleinde komemora Madre Mazzarello, ohin ita mós hanoin Aparisaun ikus Na’i-Feto Rozáriu nian iha Fátima (Portugal). Nune’e, uluknanai, iha Rozáriu ne’ebé grupu animasaun prepara, iha mós leitura kona-ba Madre Mazzarello nia Surat ba menina sira iha Las Piedras:

“Ha’u reza nafatin ba imi, atu Na’i halo imi sai boot nudar ema di’ak, piedoza no hatene obedese. Ho laran tomak hakbesik an nafatin ba irmán sira, husu sira atu hanorin imi oinsá hadomi Na’i, atu aprende didi’ak imi-nia obrigasaun nudar sarani di’ak. Hado’ok an husi maluk ne’ebé aat no la’o nafatin ho sira ne’ebé di’ak. Iha devosaun boot ba Maria Virjem, ita-nia Inan doben liu, banati-tuir ninia virtude sira, liuliu haraik an, pureza no rai an. Se imi halo ida-ne’e imi sei sai haksolok iha moris no iha oras mate” (Surat 44).

Irmán sira mós iha empeñu atu fulan-fulan iha loron 13 fahe kona-ba Madre Mazzarello nia Surat.

Aleinde fahe kona-ba Madre Mazzarello nia Surat, kalan ne’e, iha koléjiu iha mós rekreiu espesiál kona-ba Na’i-Feto nia aparisaun sira. Oportunidade atu halo menina sira koñese “Na’i-Feto nia aparisaun sira iha Fátima”. Asosiasaun hitu simu surat-tahan kona-ba Anju nia aparisaun sira iha 1916 no Na’i-Feto nia aparisaun neen husi 13 Maiu to’o 13 Outubru 1917.   Grupu ida-idak depoizde lee, deside oinsá aprezenta ba komunidade tomak.

Aparisaun sira-ne’e hatudu  Na’-i-Feto nia domin Inan nian ba ema sira, ninia preokupasaun mai ita-nia salvasaun.

(JG)