Hadomi no proteje ita-nia uma komún
Dili – Domingu, 4 de Outubro 2020. Ho objetivu atu selebra Festa São Fransisco de Asis, Padroeiru ecologia nian no loron ikus ne’ebé Amo Papa dedika ba natureza, ami husi oratório B. Ceferino Namuncurá husi Komunidade B. Eusebia Palomino nian hamutuk ho Oratório São Francisco de Sales nian ne’ebé lokaliza iha Beto-Tasi halibur hamutuk iha Beto-Tasi hodi selebra loron importante ida ne’e.
Selebrasaun ba lokraik ne’e hahuu ho orasaun no esplikasaun badak ne’ebé hatoo husi Me. Julia Marcal, FMA kona ba São Francisco de Asis, Santo bo’ot ida ne’ebé iha domin wa’in ba natureza no kriasaun hotu Maromak nian; Nia nafatin bolu balada no ai-horis sira nu’udar nia maun-alin.
Ho esplikasaun refere halo ami animadores B. Ceferino Namuncurá nian hanoin hetan kedas Liafuan ne’ebé Papa Francisco hatoo iha Dokumentu Laudato Si nian “Hear both the cry of the earth and the cry of the poor” ne’ebé signifika katak “rona tanis husi mundu (ambiente) nune’e mos ki’ak sira”, la’os de’it lolo-liman ba iha ema sira ne’ebé presiza maibé nu’udar umanu ita mos iha knaar hodi kuidadu ita nia uma-komún mak Natureza, planeta ne’ebé ita hela ba.
No ami sente ksolok tebes tamba iha lokraik ne’e ami husi oratório rua bele implementa pilar importante rua ne’ebé Papa temi ne’e iha ami nia selebrasaun, liu husi kuda ai-horis iha Beto-Tasi no mós hala’o jogus amizade nian entre oratorio rua. Maibé la’os ne’e deit atu harame selebrasaun ne’e iha mos aprezentasaun dansa no muzika husi kada oratorio.
Tuir Animador Damião de Araújo, evento ba lokraik ne’e furak tebes no nia espera katak ida ne’e sei bele akontese tan iha futuru tamba liu husi hahalok simples hanesan kuda ai-horis, oratorianu sira inklui animador sira bele aprende atu hadomi no kuida liu tan ita nia natureza.
Ami taka ami nia eventu hamutuk ba loron ne’e liu husi merenda hamutuk. Hafoin ne’e, ami husi oratorio B. Ceferino Namuncurá mós hahuu la’o hodi fila baa mi nia uman. Tuir dalan ami reza tersu tan hanesan ida hatene fulan outubro mak fulan Rosário nian.
(Animadora Laura no Vitoria S)
