Iha loron 9 Maiu 1837, moris iha Mornese-Piemonte, Itália parte Tasi-Feto nian, Maria Domenica Mazzarello.
Nia inan-aman servisu nu’udar to’os-na’in no sedu liu nia aprende arte serbisu ho rai. Nia aman iha influénsia boot iha nia formasaun basá nia ema onestu no sarani  komprometidu.

Iha uma to’os nian iha Valponasca nia hatudu sai nia domin boot ba Jezús Eukaristia: nia loron hahú tuku  haat dadeer  atu partisipa misa iha uma-kreda aldeia nian no tuku 7 nune’e nia fila fali ona ba uma atu  halo serbisu todan iha to’os.

Buat hotu la’o normál entre serbisu iha to’os no empeñu sira grupu Imakulada nian, bainhira iha 1860, epidemia tifu nakfera. Maín, hanesan ema hotu hanaran nia, bá asiste familiár sira ne’ebé rekupera husi moras, maibé iha kontrapartida nia maka kona fali moras ne’e. Nia hetan isin-di’ak maibé sai fraka liu no lahó kbiit atu serbisu iha to’os. Maromak nia planu dala barak mak imprevizivel maibé nafatin planu domin nian. Maria harohan nafatin no husu konsellu ba ninia futuru, liuliu ba P. Pestarino, responsavel ba grupu Imakulada. Naroman mosu ba nia, no nia belun Petronila, hahú aprende kostura ho alfaiate aldeia nian. Lakleur de’it sira ho preparasaun ne’ebé iha ona, loke sala kostura atu hanorin katekeze no tulun menina sira aldeia nian manán moris ho onestidade. Pedidu sira atu simu menina oan-kiak sira halo atu hahú internadu dahuluk.

Tempu hanesan, iha zona hanesan Piemonte nian, Don Bosco, funda obra ida ba labarik mane lurón nian no hetan aprovasaun lais husi Amu-Papa. Nia rasik mak interpela Don Bosco atu halo ba menina sira buat ne’ebé nia halo ba mane oan sira. Liutiha ida-ne’e, Don Bosco iha mehi ida, haree grupu ida menina kiak sira halai mai nia hodi husu atu nia tau matan ba sira. Iha tempu ne’e Don Bosco hasoru malu ho P. Pestarino iha komboiu laran. Sira ko’alia kona-ba servisu ba foin-sa’e sira no P. Pestarino konvida Don Bosco atu bá Mornese no tama iha kontaktu diretu ho Maria Mazzarello, nia kolega sira no obra grupu Imakulada nian, leiga sira ne’ebé P. Pestarino harii. Don Bosco komprende kedas katak iha ne’ebá maka nia hetan rekursu umanu sira atu hahú misaun ba menina sira nia edukasaun.

Iha loron 5 Agostu 1872 ho modu ofisiál moris Institutu Figlie di Maria Ausilaitrice, Maria Domenica Mazzarello maka superiora dahuluk. Irmán no aluna sira hadomi nia no nia konsege, liuhusi ninia ezemplu tulun manán difikuldade oioin no kakiak inísiu sira-nian.

Nia mate ho tinan 44, iha loron 14 Maiu 1881. Institutu iha tempu ne’ebá soi uma iha Itália, Fransa no Amérika Latina. Ba irmán sira no foin-sa’e sira nia hakerek, hodi estimula sira atu moris nafatin iha ksolok, nu’udar rezultadu uniaun nian ho Maromak no konfiansa iha Maria Ausiliadora. Ohin loron nia ezemplu moris nian, kontinua anima foin-sa’e feto seluk atu la’o tuir dalan hanesan dedikasaun nian ba Maromak, hodi serví juventude.

Beatifikasaun: 20-11-1938

Kanonizasaun: 24-6-1951