Venilale – Komunidade Maria Mazzarello taka “Season of Creation” ho festa S. Francisco de Assis ohin, 3 Outubru, tanba aban loron Domingu. Apropriadu tebes atu taka “Season of Creation” ka Tempu Kriasaun nian ho S. Francisco tanba nia mak Patronu ekolojia nian,  deklara husi Amu-Papa S.João Paulo II ho bula Inter Sanctos, iha 29 Novembru 1979. Papa Francisco mós hodi hili nia naran ba ninia pontifikadu, hodi hakerek ensíklika Laudato Sí dehan: «Ha’u fiar katak Francisco mak ezemplu boot liu kona-ba kuidadu ba buat ne’ebé fraku no ba ekolojia integrál, moris iha ksolok no autentisidade. Nia mak santu patronu ba ema hotu ne’ebé estuda no serbisu iha kampu ekolojia nian, santu ida-ne’ebé ema baraka ne’ebé la’ós sarani mós hadomi». Defaktu ensíklika ne’ebé ohin, 3 Outubru nia sei asina iha S. Francisco de Assis nia rain, nia títulu mós husi ninia Liafuan sira ba ninia Irmaun sira: “Fratelli tutti”.

Tema ba momentu datoluk mak “Season of Creation: tempu atu agradese no selebra kriasaun”, nu’udar momentu datoluk depoizde momentu dahuluk husu perdaun nian (13 Setembru) no momentu daruak konaba kuidadu ambiente. Ba momentu daruak ami konvida estudante Eskola Sekundária Jerál S. João Bosco, ba momentu ne’e ami konvida komunidade Maria Auxiliadora no orfanatu. Partisipa iha-ne’e, Ir Cecilia, formande no orfan ki’ik-oan sira, tanba boot sira ba foho Na’i-Feto Ariana, tuir programa husi sira-nia eskola.

Selebrasaun hahú ho Santa Missa selebra husi P. Abrão, ami-nia kapelaun, hodi  harohan atu iha tempu ne’e atu ita moris tuir Papa Francisco nia ensíklika kona-ba Kuidadu ba ita-nia Uma Komún nia vizaun no valór sira, nune’e mós ensíklika foun “Fratelli tutti” ne’ebé nia sei asina ohin iha Assisi (Itália). Ho modu partikulár ami harohan atu bele iha atensaun boot liután ba justisa sosiál, justisa klimátika, no justisa entre jerasaun sira.

Hotu tiha Santa Missa, kontinua kedas ho teatru kona-ba “Laudato Sí” Kuidadu kona-ba uma Komún”. Iha teatru ne’e, liuhusi dansa sira haktuir mensajen atu ita hadomi ita nia natureza no maun-alin. Porezemplu  bainhira loron la presiza loke eletrisidade, la estraga bee arbiru no taka torneira bainhira haree bee suli estraga de’it, soe foer iha lixu nia fatin no kuda ai-hun. Ne’e dalan ruma atu bele hafurak fali ita-nia mundu – “ita nia uma komun”.

(JG)