Ohin ita selebra festa Arkanju na’in tolu: Miguel, Gabriel no Rafael. Kreda Katólika, hodi Espíritu Santu nia gia, simu husi Testamentu Tuan devosaun ba belun sira-ne’e, protetór no intersesór ne’ebé husi Lalehan mai tulun ita, hanesan S.Paulo hateten, ita moris iha luta ka funu konstante. Liafuan “Arkanju” signifika “Anju prinsipál”. Liafuan “Anju”, signifika “mensajeiru”.

S. Miguel

Arkanju Miguel nia naran soi signifikadu reveladór iha ebraiku: “Sé mak hanesan Maromak”. Tuir Bíblia, nia mak ida husi espíritu asistente na’in hitu iha Tronu Aas Liu Bá, tanba ne’e, nia mak prínsipe boot ida Lalehan nian no Maromak nia ministru. Iha Antigu Testamentu profeta Daniel bolu S. Miguel prínsipe protetór judeu sira nian, enkuantu iha Testamentu Foun nia mak Maromak nia oan sira no Kreda nia protetór, basá molok Na’i nia vinda daruak ita iha luta espirituál kontra ne’ebé lakon, no hakarak halo ita mós lakon. “Funu hahú iha lalehan, wainhira Miguel ho nia anju sira hafunu samea. Samea ne’e hafunu fali hamutuk ho nia anju sira, maibé sira lakon no la iha ona fatin ba sira iha lalehan” (Apokalipse 12,7-8)

S. Gabriel

Arkanju ne’e nia naran, temi dala rua iha Daniel nia profesia, signifika “Maromak nia kbiit” ka “Maromak mak ha’u-nia protesaun”. Arkanju ne’e koñesidu liu tanba ninia misaun singulár mensajeiru nian, basá Maromak haruka nia atu fó sai João Batista nia moris no, prinsipalmente, haklaken faktu istóriku boot liu: “Liu tiha fulan neen, Maromak haruka anju Gabriel ba knua ida Galileia nian, naran Nazaré… Anju bá hasoru Maria no dehan: “Rahun di’ak, feto kmanek wa’in tebes! Na’i ho ita!…” husi loron ne’e, tuir S. Lucas ninia hakerek iha kapítulu dahuluk ninia Evanjellu nian, akontese Enkarnasaun.

S. Rafael

Espíritu hitu sira ne’ebé asiste Maromak nia Tronu ida mak Rafael. Rafael mosu iha Testamentu Tuan iha livru Tobit nian. Arkanju ne’e nia naran singifika “Maromak kura” ka “Maromak nia Medisina”, fó hikas matan moos ba Tobit no hatudu katak ninia prezensa, hanesan Miguel no Gabriel, haksumik an, maibé prezensa belun nian no importante. “Tobias bá buka ema ruma ne’ebé bele akompaña nia no hatene didi’ak dalan. Bainhira nia sai, nia hasoru anju Rafael, hamri’ik iha nia oin, maibé nia la hanoin katak ne’e mak Maromak nia anju ida” (Tob 5,4).