Dili, 27 Setembro 2020, Hafoin de selebra seremonia hamutuk ho animadore tomak Filhas de Maria Auxiliadora sira nian iha Dili laran ho tema. Ami animadores husi Oratório Beato Ceferino Namuncura nian iha loron daruak kontinua kedas ami nia selebrasaun agradesimentu nian ba Me. Sebastiana, FMA nu’udar Madre superiora ba komunidade B. Eusibia Palomino nian, hamutuk ho oratorianu sira no grupu bo’ot Infansia Missionaria nian na’in atus rua (200).

Ami loke ami nia seremonia ho animasaun balun hanesan hananu no dansa hamutuk. I Hafoin ne’e, ami kontinua kedas ho Quiz Biblia nian hodi selebra fulan Setembro ne’ebé sai hanesan Fulan Biblia nian no Quiz ne’e rasik hetan partesipasaun husi alin oratorianu no grupu Infansia Missionária sira. Hotu tiha ne’e,  ami hotu hamutuk ho Madre sira hato’o ami nia agradesimentu ba Me. Sebastiana. Iha momentu especiál ida ne’e ami hakarak teb-tebes agradese ba Madre Superiora, no komunidade B. Eusebia Palomino ninia prezensa no laran di’ak hodi anima no tau matan ba ami hotu hamutuk ho Oratoriano sira. Madre Sebastiana hanesan inan ida ne’ebe sempre suporta ami animador sira atu halao didiak ami nia knaar no hatene atu kuidadu oratorianu no hadomi sira.

Iha madre nia boatarde lokraik nian, Madre koalia kona-ba “konhese Jesus no Maria”, iha biban refere, Madre mós hatoo katak “imi la bele fo agradese mai hau, maibe ami mak agradese ba imi, tamba, imi mak sai prezente ba ami.” Madre mós hato’o katak Nain-Feto Auxiliadora mós hanorin ita atu hadomi Jesus tan ne’e ita mós tenke aprende atu hadomi ita nia maluk sira iha oratorio no mos aprende atu hadomi bin, maun animador  no madre sira iha ita nia oratorio. Depois-de Madre Sebastiana fó liafuan di’ak no mensajen balun, oratoriano sira hamutuk ho grupu Infansia Missionaria sira aprezenta dansa no drama ruma,  entre sira mak Drama ho titulo “Jardin Mama Margarida”. Iha drama ida ne’e joven sira sai hanesan ai-funan ho kór la hanesan iha jardin laran, hodi kompara sira nia-an ba malu. Iha drama ida ne’e mos hakarak koalia kona ba jovem no labarik sira oratirano nian mak sai hanesan ai funan ne’ebe hetan domin no atensaun husi madre sira. No ikus liu mak hasai foto hamutuk ho madre no simu merenda, taka ho orasaun no fahe malu. Obrigado.

(Animadora Laura, Vitoria, Madre Tereza)