Fuiloro, 27 Setembru 2020, Aman /Inan husi menina Kursus Computer e Costura Fuiloro hala’o enkontru ida ho koordenadora  kursu Irmán Ines Freitas Bartolo, FMA, iha Koléjiu Maddalena Morano Fuiloro, hodi haree hamutuk oan sira nia estájiu ba fulan rua nian iha edifísiu sira mak hanesan Dili & Lospalos.

Molok enkontru inan-aman ka família sira hamutuk ho oan sira hasae agradese no hahí ba Maromak hodi partisipa hamutuk Eukaristia Santa Domingu nian ne’ebé prezide husi Padre Albino Fernandes, Sdb.

Enkontru ne’e ninia ojetivu mak: Irmán Responsavel haree hamutuk ho inan Aman/ Responsavel sira kona ba Regulamentu estájiu nian, liu –liu koalia kona ba: dixiplina iha Serbisu fatin, hahalok sira ne’ebé proibidu ne’ebé fó hanoin atu lamonu ba hahalok aat sira.Se karik lahalo tuir mak sei iha sansaun ba hahalok sira ne’e.

Tempu hanesan fó sai mós menina sira nia naran ne’ebé sei ba hala’o estájiu iha fatin oin-oin, liuliu iha Dili & Lospalos. Totál Menina Kursu hamutuk 58 menina. Kursu Administrasaun / Computer hamutuk 53, Costura hamutuk nain 5. Sira ne’ebé sei ba halo pratika iha Dili hamutuk 28 menina, iha edifísiu 5. Iha Lospalos hamutuk 30 menina, iha edifísiu 17.

Enkontru ne’e hetan kolaborasaun di’ak ho inan aman sira, liuliu haree hamutuk oan sira nia hakaas an atu tama ba mundu serbisu nian ne’ebé foin hahú atu ba. Importante inan /aman  sira komprende kona ba moris nia signifikadu hodi nune’e sira bele akompaña oan sira nia kreximentu iha fulan rua nia laran.

Iha biban ne’e hatudu mós ba inan / aman sira liu husi video badak ne’ebé oan sira nia moris iha Koléjiu durante fulan 10 nia laran hamutuk ho Irmán, kolaboradora no belun sira seluk. Sira nia aprendizjen iha Area Computer & Suku nian no mós moris orasaun no Sakramentu sira ne’ebé sai forsa ida ba sira nia moris espirituál.

Ikus nian liafuan badak husi Madre Superiora, Madre Ermelinda Gomes, FMA, husu ba inan aman sira kontribusaun atu haree katak oan balun iha fini vokasaun nian, keta karak atu oferese oan feto ida ba Maromak hodi sai Irmán FMA ou Relizioza ida. Nai bolu no sei fó dalan hodi lao ba oin.   Agradesimentu mós husi família sira liuliu ba ba oan sira ne’ebé hetan edukasaun iha fatin ida ne’e. Obrigada barak