Dili, Comoro, 26-27 Setembru 2020. Atu selebra fulan Bíblia nian Madre no animadore FMA sira hotu iha Dili laran, hamutuk 70 (Oratorio Jaoun Paulo II, oratorio Maria Auiliadora, Oratorio B. Ceferinu Namuncura no Infánsia Misionária husi Parokia Maria Auxiliadora Komoro) hala’o Formasaun kona ba Maromak nia Lia Fuan hodi  sorumutu hamutuk iha escola Maria Auxiliadora Comoro. “Animador Hasoru malu ho Maromak Kriadór (Lectio Divina)” mak sai nudar tema ba eventu refere ho objektivu atu animador konhese no haklean Maromak futar Lia-Fuan sira hodi enkontru pessoal ho Nia, rekonese nia nudar kriador, husik Lia-Fuan haroman moris, nune’e brani halo mudansa ba moris rasik no ema seluk, hodi aplika mos  projetu “Insieme noi Possiamo” (hamutuk ita bele). Projetu ida ne`e oferese passu haat: Rona, imajina, halo no partilha.

Eventu ne’e hahu ho liafuan benvindo nian ne’ebe hato husi Ir. Julia Marcal, FMA iha tempu hanesan Madre mos explika konaba metologia Lectio Divina, mak hanesan Le, medita, Orasaun no Kontempla. Hafoin, tulun animadores sira komprende didiak passu sira oinsa halo  lectio Divina nian mak madre fo oportunidade ba animadores sira atu reflete evangelho Mc 10, 46-52, ne’ebe koalia konaba Jesus halo Bartimeu hare fali uja metologia lecio Divina. Atu tulun animadores sira komprende diak passagen biblika refere madre mos husu atu animadores ida-idak deskobre no hakerek sai aspetu hotu ne’ebe impede sira atu halo inkontru ho Maromak iha sira nia moris loron-loron nian. Animadores hetan oportunidade hodi hakbesik ba Sacramento rekonsiliasaun, ho hakarak atu halo mudansa ba moris, hodi hakribit buat aat ho simboliza sunu surat tahan nebe hakerek ona konaba hahalok sira nebe halo sira sai matan delek no sira halakan fali lilin foun iha sira nia fuan no moris. Atu harame eventu refere iha mos program seluk mak hanesan animasaun nebe apresenta husi oratorio ida-idak, drama  no mos Quiz Bíblia nian, buat hotu-hotu ho objektu atu konhese diak Maromak hodi hadomi malu nudar nia Kreasaun.

Kalan molok toba iha Boa Noite nebe hato husi Ir. Sebastiana, FMA, superiora komunidade Beata Eusebia Palomino. Mensagem importante ne’ebe madre husik hela mak Share, Care no Joy katak fahe buat nebe hau iha ba ema seluk, Tau matan ba buat nebe Nai fo ba o no haksolok.

Loron daruak sai mos nudar loron ikus ba sorumutu entre animadores sira nian, hahu ho Orasaun dader nian ne’ebe dirije  huis Ir. Julia Marcal, FMA. Cerimonia hahu kedas ho diskursu konaba Cyber Bullyng, hahalok sira ne’ebe trata, tolok, goja, hatun ema seluk nia dignidade liu husi internet, dalabarak ita halo hela cyber bullyng maibe ita lahatene katak ida ne’e fo impaktu boot ba ema nia kresimentu mentalidade, emosional no fisiku no direito labarik nian, violencia hasoru labarik sai nudar preukupasaun as ba ema hotu liu-liu ba iha konvensaun direitu labarik nian tamba indireitamente bele hafraku labarik nia mentalidade no fisiku nebe bele kausa labarik atu komete suicido.  Diskursu refere hato’o husi animadores husi oratorio FMA nian nain tolu, Afonso Ximenes, Fernanda Bernadino & Vitoria Soares no hetan partisipasaun maka’as husi animadores sira seluk liu husi husu no hatan perguntas no halo diskusaun. Atu remata eventu ne’e animadores no Irman sira tuir missa hamutuk nebe celebra husi Padre Cesar, SDB.

Ami agradese tebes ba oportunidade furak ida ne’e, tamba bele halo esperiensa dala ida tan Maromak nia domin ba ami, liu -liu moris hamutuk momentu orasaun nian  hodi fahe ba malu esperiensia fiae no matenek oi-oin atu halo mundasa ba ami nia moris hodi capacita an diak liu tan nudar animadores oratorio FMA ho fuan Don Bosco nian, hadomi labarik no maluk joven sira no responsavell atu tau matan ba Casa comun nudar hateten iha Laudato Si, ”Tempu Kreasaun nian. Ikus ami nia obrigada barak ba madre sira iha Komuidade B. Eusebia Palomino nebe  organiza no halo buat hotu hodi facilita ami nia formasaun.

(Afonso-Vitoria-Junita no me. Teresa)