Dili – Ne’e mak tema ba festa agradesimentu komunidade ba tinan ida ne’e nian. Tinan ida ne’e festa agradesimentu hahu uluk hodi Agradese no reza,  durante loron sia nia laran, ba grupu oin-oin ne’ebé hola parte iha komunidade ida ne’e: alunos sira, Komunidade Edukativa, Família Salesiana, Nailulik kapelaun sira, oratorianu sira, traballadór/a sira, Benfeitór/a sira, foin-sa’e sira no mós ba Irmán ida-idak komunidade ne’e nian. Iha loron ikus, dedika de’it hodi hahi no agradese Maromak ba Me. Sebastina da Costa, FMA, nu’udar diretora komunidade nian, ba ninia dedikasaun hodi halao knar ida ne’e ho domin, ksolok no responsabilidade no ba ninia prezensa inan nian hodi akompaña Irmán sira no ema hotu ne’ebé nia hasoru iha nia misaun.

Iha 19 Setembru 2020, mak loron festa nian. Irmán sira komunidade ne’e nian hamutuk ho Komunidade Edukativa no traballadór/a  sira selebra hamutuk festa agradesimentu hodi reza Rozáriu hamutuk, ho selebrasaun Eukaristia ne’ebé Pe. Agostinho, SDB mak selebra no depois de ida ne’e kontinua ho festa knfraternizasaun. Festa agradesimentu ida ne’e realiza ho ksolok, nakonu ho sensu gratidaun no fraternidade. Tebes duni katak ema ida-idak ho sira nia prezensa, sira nia hamnasa midar, ho sira nia kolaborasaun, pasiénsia, ksolok, domin, pasiénsia, etc, sai ona prezente furak husi Maromak ba ema seluk. Tamba ne’e merese simu apresiasuan no liafuan OBRIGADA!

Loron 20 Setembru 2020, Komunidade (Irmán sira) kontinua sira nia festa agradesimentu hodi ba halo paseiu hamutuk iha foho Rabilau iha Maubise. Fatin ida ho nia natureza furak teb-tebes. Iha foho leten iha Estátua Na’i-Feto nian ne’ebé ema barak mak halo peregrinasaun ba ne’ebá. Maske tenke sae foho utioan, ho udan no malirin, maibé ho korajem konsege to’o duni iha ne’ebá. Buat ne’ebé furak mak, durante iha viajen ba foho iha mós foin-sa’e ruma (grupu Akólitu sira) husi Same ne’ebé halo mós peregrinasaun iha ne’ebá. Ho sira nia prezensa ksolok no entuziasmu maske dalan sae ba foho susar uitoan maibé la sente kole. Irmán sira kontente tebes no fila fali ho ksolok boot tan bele to’o duni iha fatin furak ida ne’ebá.  Obrigada

(Suzana Alves FMA)