Kreda Katólika, Kreda protestante barak no Kreda ortodoksa selebra festa litúrjika Ezaltasaun Santa Krús nian, iha 14 Setembru, aniversáriu deskoberta Krús loos nian husi santa Helena (14 Settembru 320), imperadór Constantino nia inan, no konsagrasaun Kreda “Santo Sepulcro” iha Jerusalém (335). Tuir tradisaun, Santa Helena lori parte ida Krús nian ba Roma, iha fatin ne’ebé sai bazílka ‘Santa Croce in Gerusalemme’, no parte ida hela iha Jerusalém. Pérsia hadau Krús iha 614, hafoin lori hikas triunfalmente ba Sidade Santa.

Iha selebrasaun eukarístika loron ne’e nian kór litúrjiku mak mean, kór Jezús nia Paixaun nian ne’ebé fó hanoin Santa Krús no uza mós iha loron Sesta Santa iha-ne’ebé sarani katóliku sira halo adorasaun Krús nian. Iha Oriente, festa ne’e nia importánsia tanesan ho Páskua.

SÁ LOOS SIGNIFIKADU SELEBRASAUN NE’E NIAN?

Krús, sinál tortura maka’as nian, mak ai-hun moris nian ba ema sarani, toba-fatin, tronu, altár aliansa foun nian. Husi Kristu, Adaun foun toba iha krús, suli mai sakramentu maravillozu ba Kreda tomak. Krús mak sinál Kristu nu’uda Na’i ba ema hotu ne’ebé iha Batizmu konfigura an ho Nia iha mate no iha glória. Iha Padre Igreja sira nia tradisaun krús mak sinál Mane Makso’in nian ne’ebé sei mosu iha tempu nia rohan. Festa Ezaltasaun Krús nian, ne’ebé iha Oriente tanesan ho Páskua, liga ho dedikasaun bazílika konstantiniana sira hari’i iha Gólgota no iha Kristu nia sepulkru/rate (Missal romano).

Evanjelizasaun ne’ebé Apóstolu sira hala’o mak aprezentasaun “Kristu hedi iha Krús”. Sarani ida tenke aseita lia-loos ida-ne’e, “hedi nia iha krús ho Kristu”, katak tenke lori ninia krús rasik loroloron, hodi suporta kanek no terus sira, hanesan Kristu, agrava tan ho naha “patibulum” nian (krús nia liman orizontál, ne’ebé kondenadu lori iha nia kabaas to’o fatin tortura nian iha-ne’ebé hari’i ho modu estavel nia riin vertikál), forsadu atu simu ema hotu nia insultu tuir dalan ba Gólgota. Terus sira ne’ebé reprodús iha Kreda nia isin místiku Kristu nia mate, mak kontribuisaun ida ba ema nia redensaun, no asegura partisipasaun iha Kristu Moris-Hi’as nia glória.

ISTÓRIA

Iha sékulu barak festa ne’e inklui mós komemorasaun Krús Loos nia rekuperasaun husi Pérsia nia liman iha 628, husi parte imperadór Heráclio. Iha prátika Galés (país iha Inglaterra), husi sékulu VII, festa Santa Krús selebra iha 13 Maiu. Bainhira prátika Galés no Romanu tau hamutuk, data muda Setembru no simu naran ofisiál Triunfu Krús nian iha 1963, no uza atu komemora konkista Krús nian husi Pérsia, no data Maiu nian mantein nu’udar data deskoberta Santa Krús nian.

Iha Osidente baibain refere ba loron 14 Setembru nu’udar Loron Santa Krús nian; festa iha Maiu hasain tiha husi kalendáriu litúrjiku ritu romanu nian depoizde reforma Missale Romanum ne’ebé halo durante Papa S. João XXIII nia papadu iha 1960/1962. Kreda ortodoksa komemora festa rua hotu, ida iha 14 Setembru, reprezenta festa boot ida husi festa 12 tinan litúrjiku nian, no ida seluk iha 1 Agostu iha-ne’ebé hala’o Prosisaun ho Ai-Krús veneravel, loron iha ne’ebé ema lori Krús loos nia relíkua sira iha estrada sira Constantinopla nian atu fó bensan ba sidade. Aleinde festa fiksa sira, iha mós loron seluk festa movel nian iha-ne’ebé hanoin ho modu partikulár Santa Krús. Kreda Katólika halo adorasaun Krús nian durante ofísiu Sesta Santa nian, enkuantu kreda ortodokasa selebra venerasaun ida tan Krús nian iha domingu datoluk Kuarezma Boot nian. Iha kreda hotu gregu-ortodoksa, durante Kinta Santa, lori iha prosisaun kópia ida Krús nian atu ema sira bele venera.