Eduka ba sidadaun onestu inklui valoriza patriotizmu

Venilale – Loron konsulta Populár mak loron ne’ebé hanoin fali Timor Oan sira determina ninia futuru rasik ba ukun-rasik an liu husi votasaun ne’ebé akontese iha 30 Agostu 1999 liubá.

Sai sarani di’ak no sidadaun ne’ebé onestu mak Don Bosco nia lia-menon ba foin-sa’e sira. Tan ne’e nu’udar sidadaun, menina koléjiu Madre Mazzarello mós selebra loron ne’e liuhusi knananuk no dansa hodi haksolok hamutuk.

Iha Buona Notte, Irmán Jacinta Gusmão fó lia-menon katak: “La to’o de’it kanta no dansa maibé liuliu reza ba ita-Rain. Ita admira sira ne’ebé ho brani, liuliu ferik no katuas, sira ne’ebé ho kondisaun aat lahanoin sira an, maibé brani ba halo votasaun… Sira barak husik ona Rai ne’e… Reza mós ba ukun-nain sira, atu hanoin mós ba povu nia nesesidade, reza ba ita-nia Rain iha momentu istóriku ida-ne’e. Hafoin husu ba ita-nia an: “saida mak ha’u sei halo atu realiza mehi katuas-ferik sira-nian ba independénsia ida-ne’e?” Nia hatutan tan: “Sai sidadaun ne’ebé onestu, imi presiza hatudu iha imi-nia estudu sira atu bele harii Timor ida di’ak liután”. Ne’e mak valór patriotizmu nian.

Obrigada ba votante sira pro independénsia, ba asu-wain sira… Ba sira ne’ebé oras ne’e iha ona Reinu Maromak nian, ne’ebé hadomi jerasaun foin-sa’e ba Timor ida livre no ukun rasik an: OBRIGADA/U.

Ohin loron ami bele moris hakmatek, tanba imi-nia luta, no imi-nia liman-rohan ami sei kontinua hodi hakerek istória foun ba ami-nia moris no ba Rai doben Timor-Leste.

(Alice Filipe FMA-Redasaun Fmatin)