Dili – Iha loron 24-27/8/2020, ami reflete kona-ba Vida Fraterna. Iha sesaun ida ne’e Me. Evangelina Xavier, FMA mak akompaña ami. Ami agradese ho fuan tomak ba Maromak ba domin no grasa ne’ebé ami simu, liuliu hetan oportunidade atu reflete, hakle’an no haburas fali ami nia domin ba moris komunidade liu husi materiál sira ne’ebé ami simu durante ne’e.

Iha sesaun datoluk nian ko’alia kona-ba vida fraterna iha komunidade, hodi lori ami tama kle’an liu ba realidade oinsá moris komunidade fraterna nian iha komunidade relijiosa. Hodi hateke ba moris komuñaun ninia razaun mak oinsá ita moris hamutuk nu’udar komunidade relijioza, la’ós tan motivu umana maibé tanba fiar, basa Jezús bolu ita idaidak no konsagra ita liu husi votus sira atu moris iha komuñaun ho Maromak, ho Irmán maluk sira no ho ema hotu ne’ebé ita hasoru.

Vida komuñaun ne’e la’ós uniformidade maibé unidade iha diversidade, iha karákter, orijen, idade, edukasaun, talentu no haree problema ruma la ho perspetiva hanesan, la’os atu fahe maibé hanesan São Paulo dehan; atu halo riku liután. Tanba diversidade nia hun no abut mak SANTÍSSIMA TRINDADE nain tolu keta-ketak ho knaar lahanesan maibé sira ida de’it. Hanesan mós Papa Franҫisco dehan; vida ida laiha konflitu ne’e la’ós vida. Buat ne’ebé importante atu ita haree no motivu ne’ebé kle’an liu mak ita nia moris no serbisu hamutuk tuir karizma ida, katak la’ós ho razaun umana mak lori ita ba moris hamutuk, la’ós atu hatun malu maibé Nai Jezús mak bolu ita no ita tuir Nia, atu bele to’o ideál ida mak ita nia santidade no ema seluk nia santidade maibé tuir ita nia karizma.

Perigu boot ne’ebé bele mosu mak bainhira laiha konflitu iha ita nia moris no iha mós perigu seluk ne’ebé bele estraga ita nia vida fraterna mak lahatene rekoñese ema seluk nia kapasidade no talentu sira, ne’e sei lori ita laran moras ba malu. Nune’e buka hatun malu, limite ema nia liberdade no seluk tan, ne’e mak ita lakon valór moris komuñaun nian.

Iha mós pontu importante balu ne’ebé ami hakle’an hanesan tuir mai ne’e:

Ezijénsia moris Komunidade Fraterna

Orasaun mak importante ba ezijénsia ba ita atu halo dixernimentu hodi haburas komuñaun fraterna. Nu’udar relijiozu/a ita iha karákter espirituál ne’ebé hatene rona Maromak husi klima ne’ebé hakmatek atu bele sente katak husi orasaun mak sei loke ita nia dalan moris nian ba misaun loron tomak nian. No ita rasik bele senta orasaun ne’e nia folin. Moris relijioza nia knaar mak atu hatene didi’ak Irmán ida-idak ninia naroman no nakukun ne’ebé sira koko iha sira nia moris, atu nune’e bele loke dalan ba sira, atu ho sira nia liberdade bele dezenvolve sira nia-an, sira nia talentu, kapasidade, ba komunidade nia di’ak. Ne’e duni  buat ne’ebé importante mak loke-an no fo dalan atu Irmán sira iha liberdade hodi dezenvolve sira nia talentu ba misaun tuir karizma Salesiana.

Santíssima Trindade iha komunidade ne’ebé furak liu

Iha íkone Santíssima Trindade no pasajen Abraun nian kona-ba Yahwe vizita nia, ne’ebé lori ita atu kontempla komunidade nia moris fraterna no ema nia liberdade atu harii moris fraternidade, hanesan nia ne’ebé simu ema nain-tolu hodi hela ho nia iha nia uma, hodi transforma nia moris ne’ebé iha terus ba ksolok. Tan ne’e mai ita reflete íkone Santíssima Trindade nian katak sira moris iha komuñaun, uniaun, domin no moris santu. Hanesan mós ita nia moris fraterna mak moris ne’ebé ita fahe iha domin no sai sinál komuñaun nian tan ita saran-an iha Instituto no iha Kreda. Ba relijioza sira sai ona nu’udar kristu nia membru, iha fraternidade nian, fó tulun ba malu hodi hadomi malu ho domin loos, buka atu sai uluk atu hamtauk maluk sira, lori maluk nia todan maske iha konflitu no diferensa ideia sira, ne’e hatudu katak ita halo tuir kristu nia ukun-fuan. Iha komunidade bainhira iha afetividade ne’ebé tasak mak hadomi ita nia vokasaun rasik no hadomi ema seluk tuir ita nia vokasaun nu’udar ema konsagrada.

Ita nia vida fraterna tuir Konstituisaun

Moris komunidade presiza moris tuir Konstituisaun nia hanorin, tan ne’e ita presiza iha atitude diálogu ne’ebé nakloke no familiár, kria amizade ne’ebé loos ho ema hotu, buka valóriza ema ida-idak nia kontribuisaun, talentu, kapasidade, atu nune’e bele fó buat ne’ebé di’ak liu husi hau nia-an ba ema seluk hodi lasukat maibé buka atu fó hotu hau nia kontribuisaun, ho haraik-an no simplisidade atu bele kria klima fraternidade ne’ebé loos, nune’e ita bele moris hodi kompleta malu no hodi lori misaun ba oin.

Ofisina komunidade dahuluk

Mornese mak komunidade dahuluk ne’ebé sai uma fervor nian, laran-manas ba klamar sira nia salvasaun, espíritu sakrifísiu nian, obediénsia perfeita nian, silensiu santu nian, ho simplisidade anju nian no laran kontente. Mornese mak fatin ki’ik maibé nakonu ho sakrifísiu domin nian ne’ebé Me. Mazzarello halo ho simplisidade, pasiénsia, espíritu laran manas misionária, espíritu pobreza, haraik-an, mortifikasaun, domin ba Jezús no Maria. Irmán ida-idak mak harii komunidade Mornese nakfilak ba uma domin Maromak nian.

Husi formasaun ida ne’e, tulun ami hodi tama kle’an liután kona moris komunidade dahuluk nian hodi moris iha virtude sira, valóriza santa regra no Konstituisaun, ne’ebé Irmán dahuluk sira husik hela sira nia ezemplu, atu ita mós bele imita tuir sira nia sasin moris nian kona-ba vida konsagrada. Tanba ne’e ami hakarak agradese ba Me. Evangelina ne’ebé ho domin, pasiénsia, laran-luak fahe ona ba ami Madre nia matenek no esperiénsia sira kona-ba Moris Fraterna. Maromak sei haraik Nia bensaun no grasa wain ba Madre. Ami husu atu kontinua reza mai ami atu halo esperiénsia di’ak liután no prepara-an ho kualidade atu saran-an ho ksolok ba Maromak.

(Fatima-Marta-Onesiana)