Ceferino, espiritualidade saleziana nia fuan

Ceferino nia santidade mak espresaun no fuan espiritualidade saleziana nian, espiritualidade ida halo iha alegria, amizade ho Jezús no Maria, hodi kumpre devér rasik, doasaun ba ema seluk. Ceferino reprezenta prova konvinsente kona-ba fidelidade ne’ebé  misionáriu dahuluk ne’ebé Don Bosco haruka  iha, atu repete buat ne’ebé nia halo iha Oratóriu Valdocco:  forma foin-sa’e sira sai santu. Ida-ne’e kontinua sai ita-nia empeñu ohin-loron, iha mundu ida ne’ebé presiza foin-sa’e sira ne’ebé ho impulsu sentidu moris nian, barani iha sira nia opsaun no firme iha Maromak enkuantu serví maluk sira.

Ceferino nia moris,  maka ai-kanoik ida ho tinan 19 de’it maibé riku ho ensinamentu.

Moris iha Chimpay iha 26 Agostu 1886 no simu batizmu bainhira tinan rua, husi misionário salezianu padre Milanesio, ne’ebé sai mediadór pás nian entre Mapuce sira no ezérsitu arjentinu, hodi halo atu Ceferino nia papá bele konserva títulu “gran cacique” nian ba nia an rasik, no territóriu boot Chimpay  nian ba ninia povu. Nia iha tinan 11 bainhira nia aman matríkula nia iha eskola governativa Buenos Aires nian: nia hakarak atu nia oan sai defensór nia povu nian iha futuru. Maibé Ceferino la toman no nia aman muda nia ba koléjiu salezianu “Pio IX”. Iha ne’e mak hahú aventura grasa nian, ne’ebé nakfilak nia fuan ne’ebé seidauk hetan naroman fiar nian iha sasin ida eroízmu vida sarani nian. Akontesimentu rua lori nia ba buat ne’ebé aas liu: leitura vida S. Domenico Savio nian, ne’ebé nia buka atu imita ho laran-manas, no primeira komuñaun, iha ne’ebé nia halo aliansa fidelidade absoluta ho ninia belun boot Jezús.

Loron ida – Ceferino ne’ebé aspirante salezianu ona iha Viedma – Francesco De Salvo, haree nia to’o ho kuda hanesan rai-lakan ida, hakilar ba nia:  “Ceferino, sá loos mak ó gosta liu?”. Nia hein resposta ida kona- ba kuda, arte ida ne’ebé Araucano sira matenek liu. Maibé foin-sa’e ne’e, hodi para nia kuda dehan: “Sai amlulik”, nia hatán, no kontinua halai ho kuda.

Iha tinan sira baburas interiór nian maka nia hetan moras tuberkuloze. Sira halo nia fila fali ba ninia klima moris-fatin nian, maibé la tulun. Mons. Cagliero hanoin katak iha Italia nia bele hetan kura di’ak liután. Ninia prezensa iha Itália la’ós buat ruma ne’ebé ema la nota: jornál sira ko’alia ho admirasaun kona-ba Prínsipe/liurai-oan Pampas nian. Pio X simu nia iha audiénsia privada, hodi rona nia ho interese no fó prezente  ba nia medalla “ad principes” espesiál ba prínsipe sira. Iha loron 28 Marsu 1905 nia tenke baixa iha Fatebenefratelli, iha rai-nusa Tiberina nian, no mate iha loron 11 Maiu, hodi husik marka ida laran-di’ak nian, badinas, pureza no alegria boot ne’ebé susar atu imita.

Nia maka fuan tasak ida husi espiritualidade saleziana. Ninia restu mortál sira rai iha Santuáriu Fortín Mercedes iha Argentina, no ninia rate sai fatin peregrinasaun ne’ebé nunka para, basá nia santidade iha boot liu ba povu arjentinu nia leet.

Ceferino enkarna iha nia an terus no aspirasaun sira nia emar sira husi Mapuce, ema sira ne’ebé iha ninia tinan adolexénsia nian hasoru evanjellu no loke an ba prezente fiar nian hodi edukadór matenek salezianu sira ninia matadalan. Iha espresaun ida ne’ebé halibur ninia programa tomak: “Ha’u hakarak estuda atu sai util ba ha’u-nia povu “.

Santu ida lahanesan meteoritu ida ne’ebé derepente atraversa lalehan umanidade nian, maibé nia maka rezultadu/fuan husi jestasaun família ida nian no povu ida nian ne’ebé esprime iha oan ida-ne’e sira nia kualidade di’ak liu.

Ceferino nia beatifikasaun sai konvite ida atu fiar iha foin-sa’e sira, sira ne’ebé foin evanjeliza de’it mós, atu deskobre fekundidade evanjellu nian ne’ebé la harahun buat ida ne’ebé loos duni umanu, no fiar iha kontribuisaun edukasaun nian ba servisu furak konfigurasaun ema nian atu prodús iha nia an rasik Kristu nia ilas.

Sé maka hanoin katak fiar relijioza maka forma auzénsia haka’as an nia n ba vida sosiál, nia sala. Nia maka enerjia ne’ebé halo posivel atu nakfilak istória. Santidade ne’e halo parte vida loroloron nian no signifika plenitude umanidade nian tradús iha hahalok. Santu ida mak ema auténtiku ida, realizadu, haksolok. Sasin sira mai husi Ceferino nia kontemporáneu sira lian ida de’it atu afirma ninia laran-di’ak no seriedade iha empeñu. “Nia hamnasa ho matan”, nia maluk sira hateten. Nia mak adolexente admidavel, santu. Ne’ebé ohin – tenke – propoin nu’udar modelu no ezemplu ba foin-sa’e sira…

Ita hafoun ita-nia fiar iha foin-sa’e sira, iha inkulturasaun Evanjellu no Sistema Preventivu nian.

Ceferino Namuncurá foti ba venerável iha 22 Juñu 1972; beatifikasaun iha 11 Novembru 2007 iha Papa Bento XVI nia pontifikadu.

Memória litúrjika opsionál – 26 Agostu.

 

Pascual Chávez Villanueva

(Susesór da-9 Don Bosco nian)