Dili – Husi18-21 Agostu 2020,  ami juniora sira ne’’ebé halo fulan “segundu novisiadu”, tama ba sesaun daruak nian kona ba Moris Orasaun. Ida ne’ebé akompaña ami iha sesaun ne’e mak Me. Angelita Gomes, FMA. Nia tulun ami ho ninia kompeténsia tomak no nia esperiénsia orasaun nian ne’ebé ajuda ami atu sai konxiente liu tan iha moris orasaun lor-loron nian. Maromak sei rekompensa di’ak hotu ne’ebé Madre halo ona ba ami.

Tan ne’e iha sesaun II ami reflete kona ba vida Orasaun nian. Tan orasaun mak sai nu’udar ita nia forsa no kbiit ba ita moris espirituál nian. Nune’e orasaun iha ninia kbiit atu transforma mos ita nia moris lor-loron. Tan ne’e, orasaun ne’e rasik nia objetivu mak atu tulun ita ida-idak hodi haree ba ita nia moris lor-loron nian, oinsá ita nia relasaun ho Maromak. Nune’e ho enkontru ida ne’e, fó hanoin mai ita katak orasaun mak diálogu íntimu entre ema ho Maromak nu’udar prezente grasa nian. Tan ne’e ita presiza loke-an ba Espíritu Santu ho fuan hakmatek no abandona total ba Na’i, atu Nia mai okupa no enxe ita nia fuan ho roman Na’i nian atu Nia bele transforma ita nia moris sai sarani no relijioza ne’ebé di’ak. No orasaun ne’ebé boot liu mak ita hetan iha sakramentu Eukaristia, tanba sakramentu ne’e mak hun ba sakramentu sira seluk, iha ne’eba mak ita hetan rezultadu ksolok loos nian. Atu halo orasaun ne’e sai furak liu tan, iha tipu 4 ne’ebé importante; “orasaun hahi, orasaun adorasaun, orasaun agradesementu no orasaun intersesaun”. Ita mos hetan iha Biblia Testamentu Foun nian katak Jezús rasik mos halo Ninia orasaun, maske Nia Maromak Oan maibe Nia hakarak husik hela ezemplu atu ita bele banati tuir Ninia sasin ida ne’e.

Iha sesaun ne’e ami hare kona ba orasaun tuir Konstituisaun, orasaun fuan no orasaun mentál nian. Iha Orasaun tuir Konstituisaun nia objetivu mak atu ita hatene oinsá orasaun ne’e nia valór tuir Fundadór/a sira nia hanorin. Tanba iha ita nia Konstituisaun dehan ita tenke fó prioridade ba Espíritu Santu atu hametin ita nia relasaun ho Maromak, no orasaun ne’e ninia finalidade mak dalan ida ne’ebé atu lori ita ba fiar. Tan ne’e orasaun atu sai di’ak uluknanain iha ita nia-an rasik hafoin ba ema seluk. Nune’e mos Madre Mazzarello dehan; Jezús mak ita nia forsa no ho Jezús todan sira sai kma’an, kole sira sai kma’an, tarak sira nakfilak ba ai-funan rosas, tan ne’e husi kiik kedas nia eduka nia-an atu hadomi Jezús. Orasaun Salesiana tenke simples no esensial maibe bele transforma ita nia moris no esprime sentidu festa nian. Nune’e ita nia orasaun atu hametin nia relasaun fraterna no hakle’an ita-nia laran manas apostolika nian. Orasaun Fuan no Orasaun Mental, halo ami reflete kona ba orasaun fuan nian ne’ebé mai husi St. Ireneu, katak orasaun ida ne’ebé sai husi ita nia fuan laran, ita nia hanoin no ita nia sentimentu sira hodi hato’o ba Maromak buat ne’ebé ita presiza. Nune’e atu halo didi’ak ita nia orasaun ida ne’e sai di’ak, presiza iha metodu ruma atu halo tuir hanesan; tu’ur ho maneira oioin, hamriik, haru’uk…..no tuir ema ida-idak nia kondisaun atu espresa, maibe ho fuan ne’ebé hakmatek hodi imajina katak Jezús ohin hamutuk ho hau atu halo diálogu kona ba hau nia presiza sira. Tuir fali St. Inacio de Loyola no S.Francisco de Sales, sira nain-rua nia estilu orasaun nian mak hanaran orasaun mental ne’ebé konvida ita atu reza ho imajinasaun tomak, ezemplu; ita imajina husi Jezús nia moris to’o nia mate iha Krus, hodi komtempla akontesimentu ida-idak, no hatama ita nia-an iha akontesementu ne’e atu bele sente buat hotu ne’ebé ita haree iha situasaun sira ne’ebé mosu iha ita nia imajinasaun, hafoin ikus nian taka ho orasaun Ami Aman.

Loron ikus nian ami taka ho Nain Feto nia Magnificat ne’ebé Inspetoria prepara ba festa gratidaun nian ba Me. Provinsial (Me. Alma), hodi agradese ba Madre ninia animasaun iha ita nia Inspetoria ida ne’e. Nune’e ami hakle’an no reflete testu ne’e rasik hodi charing iha orasaun nia laran, ne’ebé Madre Angelita rasik mak prepara. Nune’e mai ami, ne’e sai momentu ne’ebé atu hakle’an liu tan ami nia vida orasaun nian no sai nu’udar rikusoin ida ba ami, hodi aumenta ami nia koñesimentu ba vida orasaun hodi reza ho maneira oioin iha moris lorloron.

Obrigada barak Me. Lita ba ita nia laran luak, ksolok no domin ne’ebé ita halo ona mai ami hodi ho pasiensia, disponivel no jenerozidade fahe ona ho ami nia tempo, matenek, koñesimentu, esperiénsia no buat hotu kona ba Maromak iha moris orasaun nian. Ami fiar Maromak sei rekonpensa buat di’ak hotu ne’ebé Madre halo on aba ami. Ita reza ba malu iha dalan domin nian ida ne’e. obrigada barak ba buat hotu. Maromak fó bensaun.

(Fatima-Onesiana-Marta)