Selebra Don Bosco nia loron moris no agradese novisa Adelaide
Venilale – Iha Don Bosco nia liafuan barak mak sai liman-rohan ba ninia oan sira: “Serbisu no temperansa”; “Serbisu, paun, lalehan”; “ksolok-estudu-piedade”; “Lahó relijiaun sei la iha siénsia loos, la iha morál, la iha edukasaun”’; “Edukasaun mak buat ruma fuan nian”; “Familiaridade lori domin no domin lori konfiansa”; “Ho hahalok karidade nian ita taka infernu nia odamatan no ita loke mai ita odamatan lalehan nian”; “Sarani di’ak no sidadaun onestu”; “nst…
Don Bosco nia lema ne’ebé nia foti husi S. Francisco de Sales mak “Da Mihi Animas Coetera Tolle”, no nu’udar Don Bosco halo, FMA sira mós hakarak atu fó sira-nia moris ba klamar sira no husik buat sira seluk. Don Bosco nia konviksaun kona-ba knaar santu edukasaun foin-sa’e sira-nian haktuir iha ninia fraze tuirmai: “Imi hakarak halo buat ruma di’ak? Eduka juventude. Imi hakarak halo buat ruma santu? Eduka juventude. Imi hakrak halo buat ruma santu liu? Eduka juventude. Tebes duni, entre buat divinu sira, ida-ne’e divinu liu”.
Nune’e, Família Salesiana nia ksolok mak eduka foin-sa’e sira ho Don Bosco nia fuan. Oportunidade hotu atu halo ita hametin konviksaun ne’e. Inklui oportunidade atu hatutan Don Bosco nia hanorin sira… nune’e, ohin, 16 Agostu, iha-ne’ebé Familia Salesiana iha mundu tomak hanoin Aman Fundadór nia loron moris ba 205.
Koléjiu madre Mazzarello mós selebra Don Bosco nia loron moris ba dala 205. Durante rekreiu liu husi jogu forma fraze DB nian, kruza liafuan no hananu tutan malu ho liafuan ikus, ita buka haksolok no halo koñese oituan tan Don Bosco nia moris.
Kalan ne’e mós komunidade no menina sira no novisa Adelaide kumprimenta malu, agradese ba esperiénsia apostólika fulan ida nia laran hamutuk. Tuir Ir Adelaide, nia sente katak nia simu barak liu iha komunidade ne’e, liufali buat ne’ebé nia fó. Nia agradese ba Irmán sira nia laran-manas, ba foin-sa’e sira nia simpatia no ksolok. Irmán sira reza atu nia deskobre loron ba loron Maromak nia domin boot ba nia, hodi fó resposta laran-luak nian ba beibeik ba ninia bolun hodi serví foin-sa’e sira.
(Alice Filipe FMA)
