Venilale – Solenidade Asunsaun sai oportunidade ida ba foin-sa’e iha koléjiu Madre Mazzarello, Venilale  atu hatudu sira-nia domin ba Na’i-Feto. Aleinde triduu,  asosiasaun ida-idak hakerek knananuk ida no tau múzika ba Maria. Iha  15 Agostu kalan, grupu ida-idak aprezenta sira-nia knananuk. Grupu sira-ne’e mak Mariano, Don Bosco, Madre Mazzarello, Laura Vicuña, Cimatti, Laudato Si no Animadora sira oratóriu nian.

Kompetisaun realiza iha kalan, kada grupu mai aprezenta iha estátua Maria Auxiliadora nia oin ho sira nia knananuk.

1. Grupu Mariana ho knananuk : Nai Feto Sarani nia Inan.
2. Grupu DB : Hananu ba ita Virjen sala laek.
3. Grupu Madre Mazzarello : Nai Feto ami Liurai Feto.
4. Grupu Laudato Si : Maria Inan Domin nain.
5. Animadoras : Ave Maria Inan Sala laek.

Objetivu husi atividade ida ne’e mak atu haburas devosaun ba Maria ita Inan, hatene oinsá espresa fiar no relasaun oan ida nian ba ninia Inan liu husi hakerek no hananu múzika; tempu hanesan, dezenvolve talentu iha hakerek no hananu múzika.

Rezultadu husi kompetisaun ne’e sei fó sai iha loron 22, loron koroasaun Maria Virjen nu’udar Liurai Feto lalehan no rai nian.

(Alice Filipe FMA)