Dili – Husi 6 – 12 Agostu, Imán na’in 14, grupu ikus nian, halo ezersísiu espírituál anuál iha Comoro. Retiru tinan ida ne’e Irmán sira la hasoru pregadór, Pe. Rolando ho diretamente maibé liuhusi gravasaun. Maske nune’e Irmán sira nafatin kria klima retiru nian to’o remata.
Misa abertura, preside husi padre Provinsiál, Pe. Apolinário Ornai Neto, SDB.
Tema ne’ebé Irmán sira hakle’an iha retiru ne ‘e mak :

• Maromak nia grasa
• Abraun nia vokasaun
• Espíritu serví nian
• Rahun-di’ak sira
• Moris orasaun nian
• Espiritualidade Mariana FMA nian
• Jezús iha Eukaristia

Nu’udar Buona notte, kalan-kalan madre Provinsiál, madre Alma Castagna, fahe ho Irmán sira kona-ba pasajen Evanjellu kazamentu KANÁ nian. Liu-liu ema sira ne’ebé kolabora iha milagre ida ne’e: Maria nia prezensa, Noiva, Jezús, Atan sira no mós Tua Di’ak, hodi halo ligasaun ho Madre Mazzarello nia moris.
Madre Provinsiál nia lia-menon ba Irmán sira atu hanesan atan sira; prontu halo buat hotu tuir obediénsia haruka; husik Jezús no Maria mak guia no haksolok nafatin mak kondisaun ema ne’ebé serbisu iha Maromak nia reinu. Nu’udar komunidade no irman idaidak nia saran an no moris sai rai metan diak ida iha ne’ebé hamosu Tua Di’ak. Nu’udar kongregasaun sai Tua Di’ak presiza hatudu sai iha Karisma. Karizma presiza tau abut metin iha rai ida ne’e liuliu Sistema Preventivu.
Agradese mós ba Pe. Manuel Pinto, Pe. Gui do Carmo no Pe. Lorenço, ne’ebé troka malu ho padre Provinsiál selebra Eukaristia.