Dili – Iha 12 Agostu,  Novisa Laura Pompeia apresenta nia mini workshop estudu Konstituisaun FMA kona ba “Ita nia moris Fraterna”.  Durante semana tolu nia laran nia estuda, reflete no hakle’an didi’ak ikus mai nia prepara fali ho modu workshop hodi aprezenta ba komunidade. Irmán nain haat(4) hamutuk ho Mestra mak akompaña ofisina ida ne’e.

Ir. Laura dehan: “ Obrigada ba oportunidade no prezensa Irmán sira  nian iha mini workshop ida ne’e, ha’u konxiente katak Irmán sira no Mestra hatene didi’ak ona kona ba Artigu ita nia Konstituisaun nian, maibé sei fó tempu atu mai rona ha’u. Hodi  aprezenta fila fali halo hau amenta liután hau nia koñesimentu. Iha ne’e ha’u deskobre katak ita nia komunidade mak komunidade ida ne’ebé halibur hamutuk iha Aman, hari’i tan Kristu moris hias Nia Prezensa. Tan ne’e mak ita metin iha Espíritu família no hatán ba foin-sa’e sira nia presiza no fó fuan wain. Basá Don Bosco dehan: “Bainhira komunidade ukun ho domin fraterna no hotu-hotu hadomi malu, ema ida-idak haksolok ho ema seluk nia prezensa, entaun uma  ne’e sei nakfilak ba uma Lalehan nian.” Tan ne’e presiza fiél ba santa regra no haburas domin resíproku ne’ebé hatudu iha rekreiu, paseiu komunitáriu no atividade hamutuk sira seluk. Iha mós dezafiu balu ne’ebé hau deskobre iha artigu sira ne’e mak hanesan: gosta kritika, falta komunikasaun ka diálogu, la valoriza malu, individualista, ladún komprende malu, sai manas/malirin iha knaar sira, fó importánsia liu ba interese pesoál, ladún loke-an ba diretora, korrije malu la ho karidade, la kuda siliensiu iha fatin ne’ebé presiza, ladún kriativu iha rekreiu nst. Ha’u mós hetan solusaun balu ba dezafiu sira ne’e mak hanesan: Presiza haree ba situasaun sira ho matan Maromak nian, hakas-an atu komprende no simu malu ho ida-idak nia diferensa, haburas Espíritu família nian liu husi diálogu, apresia malu, sai responsavel iha knaar kiik sira, sai sinseru, kuda iha an rasik atitude laran kmaus no delikadeza, iha fuan karidade nian, kontrola-an atu mantein silénsiu iha fatin ne’ebé presiza, fiél ba empeñu pesoál no komunitária, laran manas iha atividade komunitária, kriativu iha rekreiu hamutuk,  buka fahe amizade ne’ebé loos iha rekreiu nst.

Husi hanoin hirak ne’e halo ha’u konxinte katak moris hamutuk mak furak tebes maibé laos fasil. Maski nune’e hare fali ba artigu hahu nian iha Moris fraterna katak Aman mak halibur iha Kristu moris hias Nia prezensa fó serteza mai hau atu aprende, hola parte ho ksolok iha moris komunidade no hakas-an nafatin atu moris tuir buat hirak ne’e. Hau presiza ita bo’ot sira nia orasaun atu hau prepara-an di’ak liu tan hodi hatán ho ksolok loron ba loron ba Nai Nia bolu iha moris ida ne’e.

Obrigada barak.

(Laura Pompeia)