Iha Angelus domingu, 24, Papa Francisco komenta Evanjellu iha ne’ebé Pedro professa nia fiar iha Jezús, hodi define Nia nu’udar “Kristu, Maromak moris nia Oan-Mane”. Amu-Papa dehan katak, ne’e mak okaziaun atu ema ida-idak reflete kona-ba ninia fiar.

Iha resposta Simão nian, Jezús rekoñese done spesiál ida Aman nian; rekoñese katak Maromak fó ba Simão fiar ne’ebé bele konfia, atu harii Kreda iha nia leten. Nune’e, Simão simu naran “Pedro” nian, ne’ebé signifika “fatuk-inan”. Maibé atribuisaun ne’e, la’ós tanba ninia méritu umanu sira, maibé tanba fiar loos ne’ebé mai husi leten.

“Jezús iha planu atu fó moris ba Ninia Kreda, povu ida funda la’ós tanba dexendénsia, maibé iha fiar, katak iha relasaun ho Nia rasik, relasaun ida domin no konfiansa nian. No atu hahú Ninia Kreda, Jezús presiza hetan iha dixípulu sira fiar metin”.

Papa Francisco destaka katak buat ne’ebé akontese ho Pedro akontese mós ho sarani ida-idak ne’ebé iha fiar sinseru iha Jezús. Evanjellu ohin nian, Amu-Papa hateten, husu ba ita ida-idak oinsá ita-nia fiar nia lala’ok. “Sá mak Na’i hetan iha ó-nia fuan: fuan ida rai-henek nian, laran rua-rua, la fiar?, Amu-Papa husu.

“Se Na’i hetan iha ita-nia fuan fiar ida, ha’u la dehan perfeitu, maibé sinseru, jenuinu, entaun Nia haree mós iha ita fatuk moris atu hodi harii Ninia komunidade. Husi komunidade ne’e, fatuk fundamentál mak Kristu”.

Batizadu ida-idak, tuir Papa Francisco, simu bolun atu oferese ba Jezús ninia fiar rasik atu Nia bele kontinua harii Ninia Kreda. Ohin mós, Jezús husu ba Ninia dixípulu sira: “No imi, imi dehan ha’u sé loos?”, Papa Francisco fó hanoin.

“Ita harohan ba Aman Maromak, liuhusi intersesaun Virjen Maria nian, atu haraik mai ita grasa atu hatán, ho fuan sinseru: ‘Ita mak Kristu, Maromak moris nia Oan-Mane”.

Amu-Papa hotu tiha Angelus husu atu harohan ba Povu Ukraina nian ne’ebé ohin selebra festa nasionál, maibé mori siha konflitu no la iha dame. Nia hateten katak bispu ida hakerek ba nia hodi haktuir povu ne’e nia terus. Nune’e, Amu-Papa konfia ba Na’i-Feto nasaun tomak, hodi harohan liuliu ba vítima sira, familiár sira no ema hotu ne’ebé terus.