Festa Gratidaun 2014

 

Irmán doben sira, foin-sa’e sira, leigu sira, membru sira Família Saleziana nian,

ha’u hakarak hato’o ba imi agradesimentu sinseru ba esperiénsia família nian ne’ebé ita halo iha festa gratidaun ne’e.

Agradesimentu ida hasa’e liuliu ba Maromak no iha Nia habelar no hakohak ita hotu, ita-nia komunidade sira, família sira no to’o ba ida-idak nia fuan ho ksolok.

Ha’u hakarak agradese vigária Ir. Ermelinda hamutuk ho konselleira inspetoriál hotu ne’ebé kolabora ho dedikasaun jeneroza iha animasaun Inspetoria nian, ha’u agradese animadora sira komunidade nian, ha’u-nia irmán ida-idak no imi hotu foin-sa’e sira prezente iha-ne’e ba kontributu ne’ebé imi nafatin fó ba ksolok no ba festa, hamutuk ho komunidade edukativa: inan-aman sira, mestre sira, kolaboradór/a sira, antiga aluna / antigu alunu sira, maun-alin salezianu sira, salezianu/a kooperadór/a sira, ADMA, hodi forma hamutuk klima furak família nian ne’ebé Don Bosco no Madre Mazzarello rekomenda maka’as.

Obrigada tan halo festa gratidaun ne’e sai signifikativa, ho estilu oratorianu, hodi hamoris fali ksolok atu sai “família”. Ne’e hotu tau ita iha sintonia ho Kreda Universál ne’ebé prepara an atu selebra Sínodu kona-ba família.

Papa Francisco, iha ninia Omilia ida, fó konsellu kona-ba liafuan badak simples tolu atu mantein armonia iha família: konlisensa, obrigada/u no deskulpa. Ohin ita fó lian ba liafuan ida husi liafuan  tolu ne’e: OBRIGADA!!!

Dehan “obrigada” halo sai família, kria sintonia, halo ita tama iha komunikasaun kle’an, rekoñese ema seluk nu’udar rikusoin boot liu. Komunikasaun mak dalan atu harii família, uma, basá fó ba nia fuan domin nian mai husi laran-di’ak, ter

nura, responsabilidade ne’ebé halo uma ne’e sai furak no hatene simu.

Iha festa ne’e, ita konfirma empeñu atu harii loron ba loron ita-nia família, ita-nia uma, ita-nia komunidade, iha fatuk-inan ida mesak: Jezús.

Ita-nia komunidade sira, ita-nia família sira, tenke sai “Uma ne’ebé haklaken Jezús”, katak uma nakonu ho Espíritu Santu, nakonu ho ksolok; uma iha-ne’ebé, ema sira hasoru malu no hadomi malu. Espasu ida, horik-fatin iha-ne’e fuan komunika ba fuan, iha-ne’ebé moris buras loron ba loron, iha-ne’ebé bele hasoru Maromak iha foin-sa’e sira, iha ita leet, ho ema sira. Uma la’ós de’it ida halo ho tijolu no simentu. Umak mak fatin iha-ne’ebé ema sira hasoru malu. Papa Francisco hateten mai ita katak ita tenke sai ba li’ur, bá hasoru ema sira no hasoru malu nu’udar maun no biin-alin, nu’udar Jezús nia dixípulu sira, atu haklaken ita-nia fiar la’ós de’it ho liafuan maibé ho jestu konkretu sira solidariedade nian, laran-di’ak nian, delikadeza nian, karidade nian, hodi ba to’o periferia/ninin sira, bá hasoru sira ne’ebé presiza liu atu ema hadomi sira. Ita hotu presiza atu ema hadomi ita, maibé iha ema ne’ebé presiza liután basá la iha ema ida hadomi sira, tanba ne’e mak Maromak haruka ita.

Ita foin daudaun mak loke tinan selebrasaun Bisentenáriu Don Bosco nia moris nian, ita haka’as an atu uma-fukun hanaran Família Saleziana ne’e la kuran linfa/kbiit ne’ebé tahan nia.

Ita hatene sá loos mak kbiit ne’e: Don Bosco, Madre Mazzarello, foin-sa’e sira, karima salezianu. Imi mak kbiit ne’e, foin-sa’e doben sira, Imi mak ami-nia inspirasaun, sentidu ami-nia moris nian, motivasaun ba ami-nia hilin sira. “Ba imi ha’u moris, ba imi ha’u estuda, ba imi ha’u serbisu, ba imi ha’u terus no ba imi ha’u harohan. Ba imi ha’u prontu atu fó moris”, Don Bosco hateten. Nune’e, mai ita agradese ita-nia aman Don Bosco ba prezente Karizma furak ne’e… (ita halo hodi basa liman)…

Ohin, iha festa kmanek ida-ne’e, ita iha “mandatu” ba irmán ruma nu’udar animadora komunidade nian. Hodi

agradese ba sira-nia “sin” halo iha fiar, ita harohan ba sira ida-idak atu bele harii hamutuk ho irmán sira ne’ebé Na’i entrega ba sira, “uma Maromak nia domin nian, iha-ne’ebé foin-sa’e sira sente ema simu sira no iha-ne’ebé moris loroloron nian, hala’o iha domin no iha ksolok, hanaruk Maria nia Magnificat.

Atu Maria Liurai-Feto no Tulun-Na’in sai superiora loos uma nian.