Dili/Comoro, loron 05 Agostu 2020, loron ne’e FMA mundu tomak selebra loron Institutu nian ba dala 140, liu -liu hanoin fikas fali loron ne’ebe Madre Mazzarello hamutuk ho Irmán dahuluk nian simu votos ba dala uluk iha Don Bosco nia liman.

Iha loron ne’e mos Irmán Josefa Marques Boavida, FMA halo tinan 25 moris vida Relijioza nian. Tema ne’ebe nia foti ba nia loron 25 selebrasaun nian mak: “ Hau husik lakon buat hotu, wainhira hau bele manan ona Cristo” (Fil 3:8)

Selebrasaun Eukatistia hahu tuku 10.30 iha Uma FMA Comoro, prezide ba selebrasaun ne’e mak Padre Provinsiál Salesiano, Padre Apolinario Neto, SDB hamutuk ho konselebrante padre nain 6.

Iha omilia padre Provincial agradese tebes ba vokasaun ne’ebe Irmán Josefa simu husi Na’i, liu husi kongregasaun Filhas de Maria Auxiliadora (FMA). Agradese ba missionáriu/a  ne’ebe mai fahe fini vokasaun Saleziana, fini espiritualidade Valdoco no Mornese iha Timor, liu-liu ambiente vokasaun Saleziana nian. Fini ne’ebe loos duni mai husi Na’i Maromak Nia hakarak, Maromak Nia domin ne’ebe hahu kuda iha família simples, família sarani hodi kolabora ho Na’i Maromak. Fini ne’e hahu buras iha vida fiar nian liu –liu iha Maromak nia domin.

Ikus liu taka festa ne’e ho almosu konfraternizasaun e konviviu hamutuk ho Irmán no família sira hodi hahi no agradese Maromak ba moris Konsagrada vida relijioza nian ne’ebe ohin selebra hamutuk ho Irmán Josefa Marques Boavida, FMA. Parabéns

(Ines Bartolo Freitas FMA)