Husi mensajen Madre Yvonne Reungoat, Madre Superiora FMA nian, ba sítiu Web, iha okaziaun abertura aniversáriu 140 fundasaun Institutu nian, ami transkreve pasajen ruma atu tulun ita moris filafali no halo sai atuál entuziazmu inísiu sira nian.

“Loron ida hanesan loron sira seluk, loron 5 Agostu 1872, bainhira feto-raan na’in 15 konsagra an ba Na’i, hodi halo Institutu “Fglie di Maria Ausiliatrice” moris. Atu konfirma aliansa domin nian ne’e, mai Don Bosco, padre Pestarino, Mons. Sciandra, bispu Asti nian.  Sín dahuluk ne’e hahoris iha tempu sín seluk. Mornese, husi aldeia naran-laek tempu ne’ebá nian sai tiha fuan nakfetik FMA sira nian diresaun atu matan fihir bá, bee-matan atu hafoun nafatin espíritu atu konserva nia sai fresku no jenuínu nafatin.

Maria Mazzarello, fatuk dahuluk monumentu moris gratidaun nian ba Na’i-Feto, tuir Don Bosco nia hakaran, tinan 140 liutiha Institutu nia moris hanorin ita atu mantein ita-nia fatuk kabeer didi’ak atu bele evidensia kór orijinál karizma nian, haburas ho matís no reflesu sira kontestu atuál nian: haraik-an, livre iha laran, orienta an ba Esensiál, nia maka feto liafuan ida-de’it nian. Ema loos no koerente, nia iha kbiit atu ko’alia mai ita ohin-loron mós.

Iha orasaun loron hirak ne’e nian, ha’u husu ba Maria Domenica atu hatudu mai ita diresaun dalan nian atu tuir no atu haraik mai ita intuisaun espirituál ida-ne’ebé halo nia sai mestra vida no santidade nian, iha moris loroloron. Ha’u hetan indikasaun sira-ne’e iha Mornese nia simplisidade no iha ninia símbolu sira, liufali liafuan sira. Mornese maka bee-matan, abut, pontu nabilan atu hateke, atu bele alkansa profundidade no  aprende moris karizma salezianu tuir matís feminilidade nian.

Ita tama ho ain-tutun iha uma moris-fatin nian. Iha ne’e Maria Domenica sente katak Maromak simu no hadomi nia; aprende moris iha atitude sasimuk no saran an nian, domin ezijente no fiar nian. Iha ne’e nia halo tasak klima típiku família nian be dada-iis iha uma FMA sira-nian, iha ne’ebé moris nia ritmu tuir Maromak nia prezensa nune’e uma ida-idak sai “uma domin Maromak nian”.

Agora ita bá Valponasca. Husi andár okos ita sa’e ba kuartu ne’ebé janela ida sai sasin ba Maria Domenica nia matan kontemplativu. Janela koñese ninia entuziazmu sira, rai ninia mehi sira, testemuña ninia relasaun ho sasán sira. Matan ida-ne’e nakloke ba Mornese, ba to’os-uvas no ba parókia sai ba Maria Domenica lembransa kona-ba sobrenaturál. Husi ne’ebá mak tun ba nia moris entuziazmu atu tama iha dinámika eukarístika domin no saran an nian.

Ita bá rona Maria Domenica nia lia-husun: tuku hira? Ita sei komprende mós nia resposta: oras atu hadomi Maromak. Ha’u konvida imi atu fó atensaun ba imi-nia fuan nia relójiu, dinamizmu ne’ebé hakonu ho signifikadu oras no minutu sira, ne’ebé halo moris ho domin momentu prezente iha-ne’ebé hetan profundidade ho Na’i.

Ita hakat ba iha pátiu, iha kapela Collegio nia oin: ita sei hetan posu ida símbolu moris nian, serbisu nian no purifikasaun nian, komuñaun ho Espíritu nian, ksolok vado io nian. Posu mak rai prezente nian  ne’ebé Jezús oferese mai ita. Ohin hasoru dezertu espirituál ne’ebé habelar ba beibeik, ba mamamuk interiór, ba sensu ta’uk define-laek nian, ita bele sai hanesan posu nakfera no mamuk (kf Jer 2,13). Bee sá loos mak ita fó ba jerasaun foun sira?

Tinan ne’e ita selebra mós aniversáriu da-60 kanonizasaun Madre Maria Mazzarello nian. Ninia mensajen santidade nian kontein iha nia vida simples no haraik-an, haksolok no aten-barani. Vida ida iha sintonia ho Don Bosco ne’ebé nia afirma: «Ha’u sente katak Don Bosco ema-santu ida».

Ba imi hotu, irmán doben sira, ba foin-sa’e sira, ba komunidade edukativa sira, ba Família Saleziana tomak, tinan ida santidade nian, selebra iha loron 5 Agostu”.