Dili – Tinan-tinan Inspetoria  FMA TIN halo Festa Gratidaun nian hamutuk ho komunidade edukativa no foin-sa’e sira. Tinan ne’e tema ba festa “Ita: uma ne’ebé evanjeliza”.

Liafuan importante tolu “ita, uma, evanjeliza” ne’ebé sai ita-nia dalan iha tinan ne’e hodi to’o ba Kapítulu Jerál XXIII. “Ita” mak komunidade edukativa sira (foin-sa’e sira, família saleziana)  iha Timor no Indonesia ne’ebé partilla identidade karizmátika, hamutuk harii “uma” enkontru no enviu nian, uma komuñaun no misaun nian, uma profesia ida ksolok nian.

 

Festa ne’e hahú loron 23 Agostu ho selebrasaun hamutuk ho superiora sira no konselleira inspetoriál sira, ho orasaun itinerante ho tema “uma ne’ebé loke an”.

Hafoin iha loron 24, ho prezensa FMA no komunidade esukativa no foin-sa’e sira nian, festa hahú ho selebrasaun Eukaristia, liafuan ne’ebé signifika “hasa’e agradesimentu”. Agradesimentu ohin nian, hasa’e ba Maromak ba don hotu ita simu no ba madre Paola Battagliola ne’ebé nu’udar inspetora promove tali uniaun entre ita no Institutu FMA. Komunidade ida-idak iha introdusaun ba Misa, hato’o sira-nia agradesimentu ho símbolu liman ne’ebé iha nia laran hakerek trasu sira madre Paola nian: “servi-na’in, kompaixaun, fuan boot, fuan inan nian, dinámika, badinas, laran-luak, simples, sakrifikada, laran-midar, pasiénsia, haksolok, matan-moris, espíritu misionáriu, entuziazmu, laran-maus,disponivel, animasaun ne’eb´elori ba fidelidad ekarizmika.  sei sai empeñu atu harii, hamutuk ho foin-sa’e sira “uma ne’ebé evanjeliza”.

Selebrante, padre Apolinário Neto SDB, hateten katak atu harii uma ne’ebé evanjeliza presiza uluknanai “ita-nia prezensa pesoál no prezensa ida ho kualidade, virtude sira atu bele harii uma ne’ebé evanjeliza”.  Iha Misa iha mós mandatu ba diretora komunidade foun sira: Ir Santina Guterres (Kailako), Ir Lanny Ganda (Palla-Sumba, Indonesia), Ir Floriana Guterres (komunidade S. Maria Mazzarello, Venilale), Ir Esmeralda Soares (komunidade Maria Auxiliadora, Venilale), Ir Sebastiana Soares (komunidade Maddalena Morano, Fuiloro) no Ir Olga Belo (komunidade Eusebia Palomino, Dili). Ba sira Institutu entrega misaun atu anima no gia irmán no foin-sa’e sira iha dalan santidade nian tuir estilu salezianu.

Almosu hotu tiha, komisaun ba festa prepara jogu ida iha-ne’ebé envolve partisipante hotu fahe ba grupu hitu ho membru 25 ba grupu ida. Jogu ne’e adaptasaun husi “snakes and ladder” eh iha italianu “giocco dell’oca”. Grupu ida-idak buka atu to’o uluk iha meta, “Basílica Maria Ausiliatrice, Torino” hodi buka liu obstákulu sira no buka manán pontu ne’ebé favorese atu halo dalan ho lais. Jogu taka ho knananuk hamutuk ho tema “harii kadunan”.

Irmán Paola  agradese  tan “halo festa gratidaun ne’e sai signifikativa, ho estilu oratorianu no hodi hamoris fali ksolok atu sai “família”, nune’e tau ita hotu “iha sintonia ho Kreda Universál ne’ebé prepara an atu selebra Sínodu kona-ba família”.

Ikusmai, irmán Paola husu ba irmán no leigu hotu atu akompaña nia no nia no delegada ba Kapítulu Jerál ho orasaun. Nu’udar despedida, partisipante ida-idak simu rekordasaun ida, no ida-idak fila fali ba ninia fatin ho hakmatek.