Orijen

Moris iha 27 Setembru 1696, iha vila Marianella, iha sidade Napoli, Itália, Afonso de Ligório (Alphonsus de’ Liguori) mai husi família sarani, nobre no iha rikusoin. Nia aman-inan haree kedas katak Afonso iha intelijénsia privilejiada.Tanba ne’e, sira buka fó ba nia kondisaun sira atu estuda iha eskola no Universidade di’ak sira. Nia aman dedika an atu prepara nia ba estudu sira no nia inan okupa atu forma nia iha fiar sarani. No, defaktu, nia inan halo nia sai sarani ida laran-manas. Aleinde ne’e, Afonso mós eskritór, poeta no múziku. Ho tinan 16 de’it nia advogadu ona, depoizde konsege doutoradu iha direitu sivíl no ekleziástiku.

Ezersísiu direitu afavór ba ema kiak sira

Foin-sa’e advogadu matenek ne’e hahú hala’o nia profisaun iha fórum Napoli nian. Tempu hanesan, nia haburas vida espirituál. Tanba nia detekta korrupsaun iha ema sira ne’ebé kaer ukun ka iha podér, nia deside atu nunka sai advogadu korte nian. Ho sira seluk, nia atende ho atensaun no empeñu hanesan. Maibé nia halo atu fó fatin dahuluk iha ninia atendimentu ba ema kiak sira, sira ne’ebé labele selu onoráriu advogadu nian.

Desepsaun ida muda nia moris

Depoizde tinan 10 ho serbisu intensu, Afonso de Ligório sai advogadu ho susesu, famozu iha Itália tomak. Maibé, polítika lori ba nia surpreza triste ida. Tanba ema kbiit-na’in sira ruma nia influénsia, nia lakon kauza importante ida, injustamente. Lakon kauza ne’e iha impaktu boot, prejudika klase sosiál menus favoresida. Ida-ne’e halo nia koko deziluzaun boot. Nia reflete no hakerek kona-ba korrupsaun morál ninia époka nian. Nune’e, depoizde akontesimentu ne’e, nia husik buat hotu no deside tama iha vida relijioza.

Advogadu sai amlulik

Santu Afonso nia aman, foufoun, lakohi atu nia tuir vida relijioza. Maibé, bainhira nia komprende katak nia oan haksolok atu husik títulu sira nobreza nian no liman-rohan, nia aseita no haree katak ida-ne’e ninia vokasaun. Afonso estuda teolojia no simu ordenasaun amlulik nian bainhira tinan 30, iha 1726. Iha okaziaun ne’e, nia aumenta naran Maria ba ninia apelidu, nu’udar omenajen ba Jezús Kristu, liuhusi nia Inan. Husi momentu ne’e, ninia talentu no intelijénsia hotu nia tau atu serví Evanjellu. Haree kedas ninia karidade no laran-di’ak maka’as ba ema kiak sira. Nia fó folin liu atu lori konfortu espirituál ba ema hotu. S. Afonso sai pregadór boot, hodi tau hamutuk siénsia oratória nian ho Maromak nia kbiit. Ninia liafuan sira rekonsilia inimigu sira, orienta ema lakon dalan, konsola ema laran-susar sira no kura fuan sira.

Funda kongregasaun Redentorista

Konsagrasaun bispu nian

Iha tinan 1762, Amu-Papa konvida Santu Afonso atu sia bispu dioseze Santa Águeda dos Godos.  Nia aseita no sai bispu dioseze ne’e nian ba tinan 13. Iha tempu ne’e nia rohan nia retira an ba konventu Redentorista ida, tanba sofre moras artrite dejenerativa deformante, nune’e labele lori ba oin dioseze. Maibé, iha konventu nia la para serbisu. Maski kuaze matan delek no paralítiku, nia kompleta ninia obra literária, boot no importante liu. Nia hakerek livru no tratadu hamutuk 120. Sira ne’ebé koñesidu liu mak “Le glorie di Maria”, “Teologia moral”; “Visite al Santissimo Sacramento”  no “Tratatto sulla preghiera”.

Mate

Santu Afonso Maria de Ligório moris tan tinan 12, liuhusi sofrimentu fíziku barak no mate ho tinan 91. Loron ne’e mak 1 Agostu 1787, iha Nocera di Pagani Salerno, Itália. Papa Gregório XVI kanoniza nia iha 1839. Iha 1871, foti nia ba Doutór Kreda nian. Iha 1950, Papa Pio XII deklara nia Padroeiru Konfesór no Teólogu sira Teolojia Morál nian.

Orasaun ba Santu Afonso

“Na’i, haraik mai ha’u,
hodi Santu Afonso Maria de Ligório nia harohan daet,
don loloos domin fraternu nian.
Ho Ita-nia Grasa, tulun ha’u,
basá ha’u lakohi julga, kondena, ezklui.
Halo ha’u iha haraik-an atu aseita ha’u-nia defeitu sira
no buka hadi’ak liután. Amen.
Maria, Lalenok Justisa nia, harohan mai ami”.