Formasaun diretora foun komunidade FMA nian

 

Dili – Husi loron 18 to’o 22 Agostu 2014, irmán Paola Battagliola, inspetora FMA Timor-Indonesia, halo formasaun ba neo-diretora komunidade FMA na’in tolu: Ir Esmeralda Soares (komunidade Maria Auxiliadora, Venilale), Ir Santina Guterres (komunidade Madre Romero, Kailako) no Ir Lanny Ganda (komunidade Maria Mazzarello, Palla-Sumba, Indonesia). Objetivu formasaun nian mak atu hakle’an no fahe esperiénsia animasaun no governu nian tuir estilu salezianu.

Tema jerál ba formasaun mak “anima no governa iha domin” ho tópiku sira formasaun nian mak: 1) Anima ho sabedouria no fuan inan nian; 2) Animadora: feto ida ho abut iha Maromak;  3) Madre Mazzarello: feto animasaun no governu nian; 4) Formadora ne’ebé akompaña moris; 5) Formadora iha komuñaun.

Ko’alia kona-ba serví no anima ho ahi iha fuan katak, buka atu sai feto ne’ebé  harii relasaun, hatene rona, hatene halo diálogu, anima no akompaña. Serví no anima ho matan profétiku katak anima no governa hodi haree MAromak nia hakaran no ho paixaun da mihi animas. Serví no anima ho ahi iha fuan nia modelu mak Jezús Bibi-Atan Di’ak, ne’ebé metin iha relasaun ho Aman, halo nia moris Eukaristia ba maun-alin sira. Durante formasaun irmán neo-diretora sira simu mós  input husi sekretária provinsiál kona-ba arkíviu no krónika no ekonóma provinsiál kona-ba administrasaun/ekonomia.

Modalidade atu hakle’an tema sira mak liuhusi orasaun, estudu, reflesaun pesoál no partilla iha grupu. Madre Paola prepara mós lectio kona-ba “exelénsia Bibi-Atan nian” (Lectio Jo 10,11-18), “feto ne’ebé kle’an iha Maromak no feto eukaristia nian”.

Katak sá sai animadora?

Ba irmán Esmeralda soares, “sai animadora katak moris tuir buat ne’ebé Konstituisaun dehan iha artigu 54, ‘irmán ida iha irmán sira nia leet’. Iha artigu 114 fó Don Bosco dehan katak superiora loos mak Na’i-Feto raik. Ne’e mak Madre Mazzarello nia hanoin mós. Nu’udar FMA, atu hala’o knaar ida-ne’e, presiza tebes Espíritu Santu nia tulun no buka dalan atu hala’o ho fuan inan nian domin ‘firme/maka’as’ no ‘maus’, hanesan Na’i-Feto, ho fuan tomak no ba ema hotu”.

Ba irmán Lanny Ganda, atu sai animadora “uluknanai tau abut metin iha Maromak hodi tuir Ninia projetu, liuhusi moris loroloron nian hodi la’o hamutuk ho irmán sira iha espíritu família nian tuir estilu salezianu”.

Ba irmán Santina Guterres, “animadora mak irmán ida ne’ebé haka’as an ba beibeik atu sai konxiente hodi aprende liután esperiénsia haraik-an no pasiénsia nian, hodi tau laran-metin ba Maromak nia tulun no fila nafatin ba karizm Institutu nian. Ne’e hotu atu bele serví ho domin no ho vontade boot atu saran an tuir estilu salezianu, iha komunidade, iha apostoladu ho sentidu hola-parte ba Institutu”.