25 Jullu

S. Tiago (maior), Apóstolu João Evanjelista nia maun. Moris iha Betsaida Galileia; husi família peskadór Zebedeu no Salomé. Koñesidu ho naran Tiago Maior atu halo diferensa ho Tiago Menor, ka Alfeu, Jezús nia primu.

S. Tiago, apóstolu ne’ebé Jezús bolu diretamente iha tasi ibun Galileia nian hamutuk ho nia alin João nune’e mós Pedro ho nia alin Andre, bainhira sira hadia hela dai hamutuk ho sira Aman.

Entre Apóstolu nain 12, Tiago mós ida ne’ebé hetan previléjiu, hamutuk ho Pedro no João hodi akompaña Jezús iha momentu gloriozu no dolorozu. Nia partisipa iha eventu Jezús nia nakfilak An – Transfigurasaun – iha foho Tabor, no akompaña Mestre iha jardin Oliveiras nian.

Ho laran manas, nia husu atu Jezús hatún ahi ba samaritanu sira ne’ebé lakohi simu Jezús, no na ne’e Jezús haksiak nia (Lc 9,51-56). Nia iha ambisaun ba fatin dahuluk iha reinu, hodi protesta no dehan katak nia prontu ba buat hotu; tanba ne’e mak hamosu reasaun husi apóstolu sira seluk no Jezús ninia korresaun kona-ba fatin dahuluk seluk: servisu no martíriu (Mc 10,35-45; Mt 20,20-28).

Liutiha Pentekoste, S. Tiago ba haklaken Kristu iha España iha Galizia – Campostela no iha Saragoça. Hafoin fila fali ba Jerusalém, iha ne’ebá nia simu koroa mártiriu nian.  Tiago hemu kálix ne’e ne’ebé Jezús dehan ba nia: nia mak apóstolu mártir dahuluk iha primavera tinan 42. “Liurai Herodes (Agrippa I) hahú persege membru balun Kreda nian no haruka oho Tiago, João nia maun ho surik” (Após 12,1-2). Nune’e, nia mak apóstolu dahuluk ne’ebé simu koroa mártir nian, no úniku Apóstolu ne’ebé ninia mate relata iha Bíblia.

Kreda festeja ninia loron 25 Jullu.