Husi Ir Dolores Ribeiro

Same – Kongresu hahú ho Misa abertura husi Bispo D. Alberto Ricardo, no D. Norberto  do Amaral. Hotu tiha Eukaristia, kongregista sira hotu halibur hamutuk iha salaun no Amo  Alberto Ricardo, hodi dere  “Dadir “ dala tolu nu’udar sinal hahú Kongresu ba Kruz Joven tinan 2014. Tuir karta konvite ne’ebé iha katak, sei iha Oradores nain Hat; ne’e mak  ita nia Bispu sira husi Dioseze tolu iha Timor no husi Governo, Sekretariu Estado Juventude no Desportu . Maibe tamba Bispu Baucau iha Enkotro  ruma iha rai liur nune’e Ninia Vigariu mak sei hola nia fatin atu Koalia. Maibe Nia mos sei partisipa wainhira  to’o iha Timor. Nune’e hahú kongresu ho Bispo husi Diocese Maliana nian.

Orador da Dahuluk:

D. Norberto do Amaral ne’ebé koalia konaba “FAMILIA NO SAKRAMENTU”  ne’ebé  fo atensaun liu ba familia sira oin sa bele respeita malu ho nune’e bele garantia familia iha ne’ebe harmonia. Tamba husi familia mak bele sai futuru sira Kreda nian, ne’e mak Oan sira. Se familia metin iha fiar hodi partisipa no fo folin ba sakramentu sira Oan sira mos sei bele aprende husi sira no mos bele sai Kristaun ne’ebé diak iha maluk sira nia leet. Maibe se oan sira lahare sasin fiar nian husi familia sira, sira nia fiar mos sei namlele ka laiha base ne’eb’e klean.  Tamba ho edukasaun familia diak, Igreja sei nakonu no nasaun sei moris iha estabilidade nia laran

Orador da Ruak:

Vigário Jeral husi Dioseze Baucau, Pe. Francisco Pinheiro Pr, ne’ebé ho tema “ Ó RAIN NO POVU TIMOR-LESTE, Ó RAIN RAI SANTA CRUZ NO SANTA MARIA HARI’I Ó FIAR, CRUZ MARTIR SIRA NIAN TANE AS NAFATIN”  iha kontextu ida ne’e Amo Vigariu gario jeral hare liu ba istoria sira  Kreda nian ne’ebé liu husi Misionario sira nia prezensa hodi lori  Evangelhu tama iha Rai Timor-Leste ne’ebé evangeliza ita to’o ohin loron, ita nia fiar sai buras iha Timor no hetan fini barak atu kontinua Misaun ida ne’e liu husi Kongregasaun oioin ne’ebé iha. Nune’e Ita agradese Na’i ba sira nia prezensa, tamba se sira la iha ka lamai, Ita nia rain ne’e oras ne’e sei sai oinsa los?

Orador da Toluk:

Ne’ebé aprejenta hosi Governu ninian ne’ebé lolos sei apresenta hosi Secretario Estadu Juventude no Desportu nia maibe nia labele marka prezensa iha momentu ne’eba tamba iha asuntu ruma ne’ebé  prezisa tebes nia prezensa, nune’e nia delega nia xefe Gabinete ida ho Director  Geral mak partisipa iha ne’ebá no apresenta husi Chefi Gabinete ho tema               “JUVENTUDE IHA DEZENVOLVEMENTU HOSI TEMPU BA TEMPU” ne’ebé hare liu ba aktividade Desportu iha Timor-Leste ne’ebé durante ne’e halao iha Timor laran. Apresentasaun ne’e hetan protestu no lamentasaun barak husi kongresista sira kona ba aktividade desportu iha ita nia rain ne’e, ne’ebé lao hanesan Lenuk ne’ebé dolar iha rai. Sira koalia deit liu liu kona ba dezenvolvimentu sira desportu nian  ne’ebé sei mehi ba tinan ne’ebé sei mai; hanesan atu hari estadiu hat iha Ditrito Manatuto, Dili, Lospalos no Bobonaro.

Orador dahaat:

Amu-Bispu Alberto Ricardo Pr,  ne’ebe koalia konaba  “DESCOBRIMENTO  VERDADEIRA  FÈ  PELA CRUZ JOVEN AO ANO DA FAMILIA”  Nia fo hanoin  liu liu katak Kruz mak sinal salvasaun nian ba ema hotu ne’ebé liu ho Joven sira nia existensia; katak:

• Joven mak sai esperansa Familia nian.
• Joven mak sai esperansa Igreja nai
• Joven mak sai esperansa Nasaun nia

Tanba dala barak liu ita nia foinsa’e sira la respeita sira nia an no larai an halo di-diak tanba ne’e mak iha momentu ida ne’e mos bele fo hanoin ba ita hotu katak presiza atu prepara an halo di-diak atu nune’e bele garantia no asegura ita nia indepensensia Nasaun no Existensia Igreja Katolika nian.

Wainhira to’o iha momentu klaran, mai Amu-Bispu Baucau, D. Basilio do Nascimentor. Nune’e Nia hatutan deit parte ne’ebé amu D. Ricardo koalia tiha ona. Bispu Basilio foti kestaun ida konaba FÈ DINÁMIKA  ne’ebé  hare liu ba fiar ida ne’ebé book an no hare liu ida-idak nia esperensia fiar nian ne’ebé nia rasik enfrenta iha tempu ne’ebé diak no tempu ne’ebé ladiak, hafoin  ita nia Bibi  Atan ne’e mos fo hanoin mai ami Joven sira atu  ba haklaken ba ami nia maluk sira iha fatin seluk laos hodi halo homilia hanesan Nailulik sira halo maibe ho modelu “IDA BA IDA” atu nune’e  fasil liu no maske lao neineik maibe sei sai buras  no fiar mos sei sai metin.

Tebes duni, hau fiar katak Foinsa’e hotu  ne’ebé partisipa iha Kongresu ida ne’e mak rona no hakaas an duni atu bele moris tuir hanorin sira ne’ebé  Amo sira hato’o mai ami, ita bele dehan katak Fiar sarani iha Timor sei sai buras no bele garantia estabilidade nasaun iha rai laran.

 

Tuirmai, oratorianu FMA Balide nia esperiensia:

“Hau sente kontente teb-tebes tamba bele hetan oportunidade atu ba partisipa iha momentu importante ida ne’e, iha momentu ne’e ami iha rgupu rua ne’ebé  ba atu partisipaida; HUsi Oratori no ida seluk hosi Komisaun Juventude Igreja Balide nian; hosi Oratoriu rasik ami nain ne’e (6). Ami viagen husi Dili iha  oras 11:12  no to’o iha Same mais o menus oras 06:14. Hafoin halo  rejistu, simu  kartaun  identidade  no mos  faru  husi Koordenadores sira, ho marka kruz ba  kongregista sira  hotu ho gratuita, hafoin ba visita ka komprimenta Kruz. Tamba ho viagen naruk ne’ebé halo ami sente kole, nune’e ami hili atu ba  deskansa hodi prepara an fali ba misa loron tuir mai ne’ebé atu hahu ka abertura ba Kongresu ne’e no mos fo Sakramentu Krisma ba sarani Same oan sira ne’ebe sei Prejide husi Amo Bispu nain rua Dom Albert Ricardo ho Dom Norberto Amaral. Partisipantes sira ne’ebé iha ne’ebá mai husi Dioseze Tolu iha Timor no ema hamutuk nain liu 500. Ami sente kontente liu tamba liu husi atividade ida ne’e halo ami sai metin liu tan ba mi nia fiar no fanu fali ami atu sai joven ne’eb’e hatene tulun ema seluk atu haburas fiar sarani; Liu liu husi  Orador sira nia koalia ne’eb’e durante loron tolu nia laran. Orador sira ne’e mak Amu Bispo Don Alberto Ricardo  Pr. ( Dili), Don Norberto do Amaral  Pr. ( Maliana) no Vigario Geral Pe. Francisco Pinheiro Pr.  Ami hela iha ne’ebá durante loron tolu nia laran no iha dia 15 loraik ami hahu fali halo viagen atu fila mai Dili, tuir dala sarani sira nafatin komprimenta Kruz. No iha Dili ami fahe malu ho misa enceramentu abertura ba tinan 500,  Kristaun tama iha Timor no misa ne’e Selebra husi Bispo Dioseze tolu iha Timor”.

(Afonso-Animador)