Papa Francisco nia katekeze – 20 Agostu 2014

RV – Papa Francisco hahú fali katekeze iha kuarta ohin, 20 Agostu, ne’ebé nia la hala’o tanba viajen ba Koreia Sul. Iha Sala Paulo VI, nia ko’alia ba ema liu rihun ualu kona-ba ninia viajen ba kontinente aziátiku foin daudaun.

Amu-Papa hela iha Koreia husi loron 14 to’o 18 Agostu. Nia hateten katak nia  hetan Kreda ida foin-sa’e, harii iha fundamentu martir sira nian no ho espíritu misionáriu.

 

Para Francisco, halo sínteze ba viajen ne’e ho liafuan tolu: memória, esperansa no testemuñu. Iha kontestu koreanu, Kreda mak mahein memória no esperansa nian.

“Nia mak família espirituál iha ne’ebé adultu sira tranzmite ba foin-sa’e sira ahi-lakan fiar nian simu husi bei-ala sira; no memória testemuña sira-nian sai testemuñu iha prezente no esperansa futuru nian”. Tuir Papa Francisco, ne’e mak enfoke prinsipál eventu sira viajen nian: beatifikasaun martir koreanu 124 no enkontru ho foin-sa’e sira iha okaziaun Loron VI Juventude Aziátika.

Papa Francisco konxiente kona-ba papél primáriu ne’ebé leigu sira hala’o iha Kreda koreana husi kedas ninia inísiu. Nia haktuir ba sarani sira katak komunidade sarani iha Koreia la’ós misionáriu sira mak funda, maibé grupu ida foin-sa’e koreanu husi sékulu XVIII ne’ebé, tanba sente atrasaun ba hakerek sarani ruma, sira estuda no halo nia sai sira-nia regra moris nian.

“Sira haruka ida husi sira ba Pequim atu simu batizmu; bainhira fila, nia sarani ninia maluk sira. Husi núkleu dahuluk ne’e, buras komunidade boo tida ne’ebé, husi inísiu no durante tinan atus ida, sofre persegisaun maka’as no hetan martir rihun ba rihun. Ho modu ne’e, kreda koreana bazeia iha fiar, iha empeñu misionáriu no leigu sira nia martíriu”.

Papa Francisco kontinua hodi fó hanoin: “Hanesan sarani koreanu dahuluk sira pratika domin fraternu ne’ebé hakat liu siferensa sosiál, ha’u enkoraja sarani sir aohin nian atu sai laran-luak ho ema kiak liu no iha ninin”.

Atu taka nia katekeze, Papa Francisco afirma katak istória fiar nia Koreia hatudu katak Krsitu la halakon kultura sira, la kansela povu sira nia dalan, sira ne’ebé buka lialoos no pratika karidade ba Maromak no maluk sira. Kristu la hamate buat ne’ebé di’ak, maibé kompleta nia.

“Kristu hafunu no halakon inimigu aat, ne’ebé kuda diskórdia entre ema sira no entre povu sira, ne’ebé ezkluzaun atu favorese idolatria osan nian; ne’ebé halekar venenu iha foin-sa’e sira nia fuan. Ida ne’e, loos duni, Kristu hafunu nia manán ho ninia sakrifísiu domin nian. No se ita hela iha Nia, iha nia domin, ita mós, hanesan martir sira, bele moris no fó sasin kona-ba Ninia vitória. Ho fiar ne’e, ita harohan ba oan-mane no oan-feto hotu Península Koreia nian ne’ebé sofre konsekuénsia funu no divizaun nian, atu bele hala’o dalan ida fraternidade no rekonsiliasaun nian”.

Hodi husu Maria nia harohan-daet atu akompaña ema nia dalan, Papa Francisco fó nia bensan ba hotu, hodi husu dame no prosperidade ba koreanu sira.