“Juventude Ásia nian, hamriik bá”
Misa konkluzaun Loron Juventude Ásia nian
Haemi Castle (Koreia) – Papa Francisco selebra iha domingu 17 Agostu, Misa konkluzaun ba Loron Juventude Aziátika ba dala neen. Iha omilia nia reflete kona-ba tema “martir sira nia glória nabilan iha imi”. Liafuan sira-ne’e, tuir Papa Francisco fó konsolasaun no forsa.
Nia fó hanoin katak martir sira Koreia no Ásia tomak nian entrega sira nia isin ba persegidór sira, maibé mai ita sarani, sira entrega sasin Kristu nia roman nian ne’ebé halakon nakukun.
Kona-ba parte seluk tema nian – “Juventude Ásia nian, hamriik bá” – Amu-Papa esplika foin-sa’e sira-nia responsabilidade atu sai lalenok Maromak nia domin nian iha mundu. “Nu’udar joven sira ne’ebé ka moris de’it iha Ásia, maibé nu’udar oan-mane no oan-feto kontinente boot ne’e nian, imi iha direitu no devér atu hola parte tomak iha imi-nia sosiedade sira nia moris. Imi keta ta’uk atu lori sabedouria fiar nian ba kampu hotu vida sosiál nian”.
Konsentra an iha liafuan “juventude”, Papa Fancisco destaka katak fraze ne’e nakonu ho otimizmu, enerjia no vontade di’ak. Joven sira tenke husik Jezús nakfilak otimizmu ne’e iha esperansa sarani, enerjia iha virtude morál no vontade di’ak iha domin jenuinu ne’ebé hatene sakrifika an.
Amu-Papa mós subliña tan katak, joven sira la’ós de’it futuru Kreda nian, maibé sira mak parte ida nesesária prezente nian. Ho forma ne’e, nia konvida sira atu hakbesik ba beibeik Maromak, hodi gasta tinan sira juventude nian iha edifikasaun Kreda ida santa ba beibeik, misionária ba beibeik no haraik-an ba beibeik.
Iha prosesua ida-ne’e, tentasaun sira la dook husi ita, Papa Francisco fó hanoin. Iha vida sarani, joven sira hetan tentasaun atu hadook ema sira ne’ebé presiza liu, ne’ebé husu tulun. Maibé joven sira simu bolun atu hatán hanesna Kristu, ho domin, laran-sadia no kompaixaun.
Hodi taka reflesaun, Amu-Papa ko’alia kona-ba liafuan “hamriik bá”, katak nesesidade vijilánsia nian, atu tentasaun sira la atrapalla sensibilidade umana ba ksolok Evanjelllu nian. “Doben foin-sa’e sira Ásia nian, ha’u halo votus atu, ida de’it ho Kristu no Kreda, imi bele tuir lurón ida-ne’e ne’ebé tebtebes sei hakonu imi ho ksolok”.
Loron Juventude Aziátika VII sei hala’o iha Indonesia.
