Baucau (Timor-Leste) – Iha loron 22 Jullu komunidade S. Teresa d’Avila, Baucau selebra ho ksolok festa agradesimentu hamutuk ho labarik no foin-sa’e oratorianu sira no ho sira-nia inan-aman. Tema ne’ebé hili ba festa ida ne’e mak: “Hau entrega sira ba ó”, ho motivu katak atu selebra 140 aniversáriu Institutu nian furak mós atu ami-nia destinatáriu sira iha posibilidade atu koñese Madre Mazzarello no Prezensa Maria nian iha Institutu.

Preparasaun ba festa ida ne’e hala’o semana ida molok, iha ne’ebé irmán sira prepara Rozáriu hodi konvida labarik no foin-sa’e sira hamutuk ho sira-nia inan-aman reza hamutuk iha komunidade.  Intensaun ba kada Rozáriu loron ida-idak nian mak: reza ba Oratorianu sira, edukadór/a sira, Inan-Aman, benfeitór, kolaboradór/a Padre sira no ba irmán ida-idak. Loron ikus agradesimentu nian hamutuk ho oratorianu no sira-nia inan-aman mak ami hotu esprime ami nia sentidu gratidaun ba irmán Alma Castagna nia prezensa nu’udar inan, bin ne’ebé akompaña ami hotu durante tinan hirak ne’e.

Selebrasaun festa agradesimentu hahú dadeer ho konkursu finál kona-ba Na’i-Feto. Hotu tiha kuiz tuir kedas ho selebrasaun Eukaristia nian iha ne’ebé Pe. Mario Cabral mak prezide. Hodi fahe ninia reflesaun kona-ba Maromak nia liafuan ne’ebé ko’alia kona-ba Jezús Bibi-Atan di’ak , nia mós konvida no fó korajen ba inan-aman sira atu asume atitude Bibi-Atan DI’ak nian atu tau matan ba sira-nia oan rasik. Ida-ne’e mak hanesan responsabilidade boot ne’ebé Maromak hakarak husi sira.

Misa Hotu tiha irmán no animadór/a sira hala’o mós jogu ba labarik, foinsa’e no inan aman sira. Hotu-hotu partesipa ho ksolok iha jogu sira ne’e. Inan-aman sira mós kolabora ho di’ak liuliu ba mamá sira, sira rasik husu atu responsavel iha parte konsumu nian. Nune’e loron antes festa nian,  sira hahú halo preparasaun. Buat ne’ebé furak mak oinsá haree sira servisu badinas, fahe sira-nia tempu ho ksolok no hatene servisu hamutuk.  Hahán ne’ebé sira prepara to’o ba ema hotu ne’ebé partesipa iha festa ne’e.

Atu fó ksolok ba foin-sa’e sira nune’e mós ba sira nia inan-aman,  komunidade mós prepara prezente ruma ba hirak ne’ebé manán  iha konkursu marianu; nune’e mós jogu sira seluk. Ba inan-aman sira komunidade oferese medalla Maria Ausiliadora no Madre Mazzarello nian. Maski prezente simples maibé sira simu ho ksolok no ho gratidaun boot.

Konkluzaun ba festa ida-ne’e mak konvida sira hotu atu haree filme kona-ba Mamá Margarida. Tanba ba dala uluk maka sira haree filme ida-ne’e sira sente haksolok no admira hodi haree Mamá Margarida nia pasiénsia, domin no dedikasaun hodi fó ninia moris atu servisu hamutuk ho Don Bosco hodi tau matan ba labarik foin-sa’e abandonadu sira. Hanesan mamá ida esprime ninia hanoin nia dehan katak mamá Margarida mak modelu loos ba inan sira hotu.