Papa Francisco iha Koreia Sul

Oinsá mak foin-sa’e sira bele sai sasin auténtiku no haksolok Evanjellu nian? Papa Francisco fó konsellu tolu ba joven aziátiku sira halibur iha sesta, 15 Agostu, iha Santuáriu Solmoe nian. Enkontru halo parte atividade sira ne’ebé Amu-Papa realiza durante ninia viajen iha Koreia Sul, hahú iha kuarta, 13 Agostu liubá.

Francisco destaka katak Kreda, hamutuk ho foin-sa’e sira parte hotu nian, simu bolun atu harii mundu ida dame no amizade nian, hodi supera divizaun no violénsia. Maibé ne’e mak knaar ida ne’ebé dook husi espíritu mundu nian, Amu-Papa hateten, hodi sita nu’udar ezemplu diferensa ne’ebé boot ba beibeik entre ema riku no kiak sira, egoízmu no injustisa iha realidade atuál.

“Hanesan rai-fuik maran espirituál mak habelar daudaun iha mundu tomak”, Papa Francisco alerta, maibé, hodi destaka katak iha mundu ne’e, joven sira simu bolun atu bá fó sasin Evanjellu esperansa nian. Maibé oinsá halo ida-ne’e? Francisco fó konsellu tolu.

Dahuluk mak konfia iha kboot ne’ebé Kristu fó. “Imi keta lakon esperansa iha lialoos Ninia liafuan nian no iha kbiit Ninia grasa nian. Imi simu batizmu iha ninia pasajen husi mate ba moris no hetan konfirmasaun husi forsa Espíritu Santu nian ne’ebé horik iha imi-nia fuan sira, Imi keta duvida kbiit espirituál ne’e!”

Iha fatin daruak, Francisco ko’alia kona-ba nesesidade atu horik besik Maromak liuhusi orasaun loroloron nian. “Adora Maromak bá. Imi keta haluha atu adora Na’i. Ninia Espíritu hasa’e imi-nia fuan sira no tulun imu atu koñese no halo Aman nia vontade. Imi foti ksolok no kbiit husi Eukaristia”.

Pontu ikus ne’ebé Papa Francisco hatudu atu sai testemuña auténtika no haksolok Evanjellu nian mak husik atu sabedouria Kristu nia liafuan nian no ninia lialoos nia kbiit gia ita. “Nia seu hanorin atu avalia buat hotu no koñese loron ba loron ninia projetu ba imi. (…) Nia sei hatudu dalan ba ksolok loos no realizasaun nakonu”.

Amu-Papa Francisco sei hasoru fali ho joven aziátiku sira iha domingu, loron 17, iha misa enserramentu Loron Juventude Ázia nian ba dala neen. Ohin, molok hasoru joven sira, nia selebra santa misa solenidade Asunsaun Maria nian no reza Angelus ho sarani sira iha Daejeo.