Sé mak Maromak ne’ebé ita fiar? Sá loos ninia esénsia? Oinsá ita bele define nia? Liturjia loron ne’e nian dehan mai ita katak “Maromak mak domin”. No konvida ita atu kontempla Maromak nia bondade, ternura no mizerikórdia; konvida ita atu husik ita-nia an envolve iha dinámika domin nian ida-ne’e, atu moris “iha domin” ita-nia relasaun ho Maromak no ho maun-alin sira.

Leitura dahuluk mak katekeze ida kona-ba istória domin inkondisionál ne’ebé liga Jahwéh ba Israel. Leitur ahanorin katak domin – domin gratuitu, inkondisionál, eternu – mak lori Maromak atu hili Israel, atu liberta nia husi opresaun, atu halo Aliansa ida ho nia, atu hasuli ba ninia laran-sadia iha momentu konkretu barak istória nian… Israel labele nonok de’it iha domin boot no intensu Maromak nian ida-ne’e: Povu simu konvite atu kompromete an ho Jahwéh no moris tuir ninia ukun-fuan sira.

Leitura daruak define, Maromak nia esénsia: “Maromak mak domin”. “Domin” ne’e manifesta an ho forma konkreta, iha Jezús Kristu, Maromak nia Oan ne’ebé sai hanesan ema atu hatudu mai ita – to’o mate iha krús – Aman nia domin. Ema ne’ebé hakarak “koñese” Maromak, hela iha komuñaun ho Maromak, tenke simu Jezús nia proposta, kolu egoízmu, orgullu no arrogánsia no hadomi Maromak no maun-alin sira.

Evanjellu garante ita katak Maromak ne’ebé domin iha projetu salvasaun no moris rohan-laek atu oferese ba ema sira. Maromak nia proposta dirije liuliu ba ki’ik sira, haraik-an sira, oprimidu sira, ezkluidu sira, ema sira ne’ebé latan iha situasaun moris-mukit no sofrimentu nian: sira la’ós de’it ema ne’ebé presiza maibé mós ema sira ne’ebé disponivel atu simu Maromak nia don sira. Ema ne’ebé simu proposta ne’e no tuis Jezús mak bele moris nu’udar Maromak nia oan, iha komuñaun ho Nia.

Solenidade do Sagrado Coração de Jesus