Adora Santíssima Trindade

Venilale – Komunidade Madre Mazzarello Venilale, lorloron halo adorasaun atu harohan ba situasaun mundiál no nasionál. Maibé, iha Domingu Santíssima Trindade nian, 7 Juñu, komunidade nia adorasaun liuliu atu hahí Maromak Santíssima Trindade.

Adorasaun ne’e hanaran “rozáriu trinitáriu”, fahe ba momentu lima. Iha momentu dahuluk ami kontempla Maromak nia domin kbiit-tomak na’in no matenek atu komunika ninia laran-di’ak, lia-loos no beleza bainhira hakiak mundu (Gen 1,1) no lori símbolu aifunan roza nia sanak ida. Hodi lori símbolu ne’e, ami agradese Aman Maromak nia kriasaun furak.

Iha momentu daruak ami kontempla Jezús ninia transfigurasaun (Mc 9,2-7) iha-ne’ebé  prezente “Pessoa” tolu hotu Trindade nian: «Aman iha lian, Oan iha mane-maksoin, Espíritu iha kalohan nabilan».

Momentu datoluk ami kontempla Jezús ne’ebé livremente saran An nu’udar sakrifísiu ho obediénsia totál, to’o mate, nune’e, rekonsilia umanidade otmak ho Aman (Jo 10,17-18). Iha-ne’e lori símbolu krús nian atu agradese Oan ne’ebé ho ninia mate salva ita. Sinál ne’e mós husu atu ita ida-idak lori ita-nia krú sloroloron nian.

Momentu dahaat, mak momentu “moris-hi’as Kristu nian”. “Pessoa” na’in tolu Trindade nian atua hamutuk: Aman hatudu ninia kbiit; Oan “foti” dalan ho modu livre saran nia klamar no isin no Espíritu ne’ebé vivifika no glorifika” (Lc 24,5b-7).

Mistériu ka momentu dalimak, ami kontempla Espíritu Santu ne’ebé hasuli iha Maromak nia oan sira nia fuan, Santíssima Trindade nia moris rasik, katak hadomi hanesan Nia hadomi. Domin ne’e mak prinsípiu moris foun iha Kristu, ne’ebé mai husi “Espíritu Santu nia kbiit” (Rm 5,5).

Iha momentu ne’e Irmán ida lori símbolu lámpada lakan, ne’ebé simboliza Espíritu Santu ne’ebé santifika no gia ita iha moris lorloron nian, tuir Na’i nia dalan.