Retiru 2014

husi Ir Veronika Kusnadi

Dili – Retiru segundu grupu hahú iha loron festa Transfigurasaun nian ne’ebé fó signifikadu liután ba momentu retiru ne’e tanba sai hanesan konvite ida da partisipante hotu atu sa’e ba foho Tabor hamutuk ho Jezús.

Retiru ne’e hahu ho misa iha lokraik. Iha omilia, Don Mario Guariento, SDB, padre husi Itália ne’ebé fasilita no sai akompañadór retiru ne’e nian dehan katak “festa Trasfigurasaun ne’e mak festa boot ba monje sira sira tanba sira dedika sira nia moris ba Maromak de’it hodi halo orasaun, mortifikasaun, jejún, hela mesak iha rai fuik maran, nst., hotu ne’e sira halo atu loron ida bele nakfilak-an (transfigura) sai nabilan hanesan Jezús iha foho Tabor.

Festa Transfigurasaun mós loron festa boot ba relijiozu/a sira tanba nu’udar konsagrada tenke mós iha trnasfigurasaun iha moris rasik, loron ba loron. Buat ne’ebé bele halo ita-nia an transfigura (nakfilak) sai nabilan mak moris orasaun, tanba ho orasaun halo ita iha relasaun kle’an ho Maromak. Relasaun ne’ebé profundu ho Maromak mak bele halo ita sai nabilan tanba iha dame iha ita-nia fuan, iha ksolok ne’ebé mai husi Maromak”.

Loroloron durante semana tomak, kada konferénsia iha ninia tema rasik, maibé bele dehan katak ninia tema jerál mak: Feto sira iha Sagrada Eskritura testemuña fiar. Feto sira ne’ebé konstrui istória salvasaun umanidade nian.

Personajen feto sira ne’ebé iha Sagrada Eskritura laran ne’ebé Don Mario foti nu’udar tema ba konferénsia nian mak : Rut, Ester, Feto ne’ebé fakar raan (Mc. 5, 25-33), Feto Siro Fenisia (Mc.7, 24-30), Jezús iha Betania (Jo. 12, 1-11), Feto maksalak (Lc.7, 36-50), Feto Samaritana (Jo. 4, 1-42), Marta & Maria (Lc. 10, 38-42), Maria Madalena, Feto faluk nia ezmola (Lc. 21, 1-4).

Liu husi sira-nia istória ida-idak hatudu katak sira hotu mak ema maksalak ne’ebé iha momentu ida iha sira nia moris sira hasuru Jezús no halo enkontru kle’an ho Jezús ne’ebé halo sira konverte an. No sira nia nakfilak-an ida ne’e mai husi sira nia fiar, sira nia domin no dezju boot atu bele hasoru Jezús no atu bele hetan isin di’ak fali.

Sira ida-idak nia moris, mós hatudu moris konsagrada nian. Maski ho istória ka ho background ne’ebé la hanesan maibé enjerál bele dehan katak iha elementu ruma ne’ebé komún iha sira nia moris:

• œ Dezeju boot atu hasoru Jezús
• œ Enkontru profundu ho Jezús halo sira konverta an (nakfilak an)
• œ Domin ne’ebé la sukat
• œ Saran sira an tomak
• œ Halo Jezús sai sentru iha sira-nia moris, sai sira nia espozu.

Nune’e liuhusi modelu hirak ne’e, husu mós ba ita nu’udar konsagrada atu saran-an tomak ba Jezús no halo Nia sai sentru  iha ita-nia moris; signifika katak halo buat ne’ebé Nia hakarak, hanoin hanesan Nia hanoin, ko’alia hanesan Nia, laran kmaus no haraik-an, laran sadia, pasiénsia; liuliu atu hatudu iha ita-nia moris loroloron nian iha komunidade laran ho ita-nia irmán sira no ema seluk.

Iha misa loron ikus nian, Don Mario dehan katak importante liu atu tau matan nafatin ba esperiénsia espirituál ne’ebé iha durante tempu retiru ne’e. Nia mós sujere atu foti fali konferénsia ho tema 12 ne’e durante tinan ne’e nia laran, atu bele akompaña ita-nia moris. Tanba importante liu mak atu tau matan nafatin no kuidadu ba buat ne’ebé ita hetan husi retiru ne’e atu loron ba loron bele sai ema ne’ebé espirituál liután. Nia dehan mós katak hanesan iha tinan foun ba tinan sivíl no tinan foun ba eskola, iha mós tinan foun ba visa espirituál ne’ebé remata ho retiru anuál. Nune’e ohin, 13 Agostu mak hahú tinan espirituál foun ba ami hotu atu hahú la’o moris tuir espíritu foun.

Buon Anno Spirituale !!!