LORON IKUS FULAN MAIO NIAN

Dili – Iha loron 31 fulan Maio nian, ita selebra Nian feto ninia vizita ba nia prima Isabel nia uma ka Vizitasaun Nain Feto nian. Ohin mos ita selebra Solenidade Pentecostes nian. Iha loron kmanek ida ne’e ho ksolok no entuziasmu ami Irman sira no menina koleju sira ne’ebe iha Komunidade tolu iha Komoro reza tersu hamutuk hodi agradese Inan Virjen ne’ebe kontinua  vizita ita iha moris lor-loron, liu-liu iha momentu susar “pandemia nian”.  Nu’udar Inan, Nia la husik ita mesak, ita esperimenta duni Dom Bosco  nia liafuan: “ Nain Feto Pasiar nafaatin iha ita nia uma sira no taka ita ho Ninia mantu”. Ami agradese ba Maromak ne’ebe fo mai ita Maria nu’udar ita Inan no tulun nain, mai ita no ita nia povo tomak. Ami halo Prosisaun hodi lori Ilas Nain Feto nian husi komunidade ba Komunidade  hodi reflete Misterio Gloriozo no husu frutu sira Espirito Santo nian, iha tempo hanesan reza ba ema hotu ne’ebe servisu no liu husi  komunidade sira ne’ebe Ilas Nain Feto Nian sei liu.

Nune’e iha Misterio dahuluk iha Komunidade Beata Eusebia Palomino Fruto ne’ebe husu mak FIAR. “Rahun diak ba sira ne’ebe la hare maibe fiar”. Hamutuk ho Nain Feto, husu Espirito Santo atu hakonu iha Komunidade ne’e Don Sabedoria no Siensia nian atu fiel ba Maromak Nia bolu, hodi servi ho ksolok Misaun ne’ebe simu. Misterio daruak iha Komunidade, fruto ne’ebe husu mak ESERANSA. Jesus dehan: “Wainhira Hau ba ona hodi hadia fatin, Hau sei fila hikas mai lori imi ba ho Hau”. Hamutuk ho Nain Feto, husu Espirito Santo hakonu Irman no foinsae sira iha Komunidade ida ne’e ho Don Entendimento no Temor de Deus, atu  fiel nafatin ba Maromak hodi akompanha foinsae sira deskobre Maromak Nia Plano ba sira ida-idak. Iha Misterio datoluk iha TOT dedika ba sira hotu ne’ebe servisu iha TOT, Paderia no Suku. Fruto ne’ebe husu mak DOMIN FRATERNU. “Ema sei hatene katak imi Hau nia Eskolante sira, se imi hadomi malu”. Hamutuk ho Nain Feto husu Don hitu Espirito Santo nian, ba nai ulun kreda no Nasaun nian, ba familia sira no ema hotu ne’ebe hetan terus oi-oin. Iha Misterio daha’at iha Komunidade Noviciadu, Fruto ne’ebe husu  mak SANTIFIKASAUN. “Rahun diak  basira  ne’ebe laran mo’os, basá, sira sei hare Maromak”. Hamutuk ho NainFeto husu Espirito Santo hakonu iha Irman no Novisia sira Dom Piedade no Konsellu nian atu nakloke ba Maromak Nia prezensa, hodi hatan ho korajen ba Maromak Nia bolu. Iha Misterio dalimak iha Uma Ispetorial Fruto husi Misterio ne’e mak INAN VIRJEM SIMU KOROA. “sinal Maromak Nia domin ne’ebe bo’ot liu ba Maria no ba Nia Oan Jesus”… “Ita bo’ot Diak liu Feto hotu-hotu, no ita bo’ot Nia Oan JESUS diak liu”. Hamutuk ho Nain Feto husu Dom Fortaleza nian ba Me. Alma, iha Saude diak, kontinua lao hautuk ho ita loron ba loron nune’e hamutuk ita deskobre liu tan fafurak Maromak nia bolun nu’udar FMA. Hafoun –an nu’udar Maria Auxiliadora nia oan Feto sira, husik ita nia kusi mamuk, hanesan iha Kasamento Kana’a nian,hodi rona didiak Maria nia lia funa sira: “imi halo tuir  buat ne’ebe Nia sei dehan ba imi”. Atu Jesus hakonu kusi mamuk sira ho Tua Foun; domin, Ksolok no Fraternidade nian, atu bele servi malu iha komunidade no hamutuk iha Misaun.

Iha okaziaun Especial ne’e, Me. Alma hato’o buona note ba ami hodi dehan: “ ohin rona didiak II Leitura, ita rona liafuan ida-rua ne’ebe repete bebeik ‘IDA DEIT’ atu dehan kona ba Espírito Santo Nia servisu. Espirito Santo Nia servisu atu krea uniaun no komuniaun laos atu halo ita hotu fotocopia ida deit ka hanesan deit, maibe oinsa Espirito Santo tulun ita ho ita nia diversidade no karater ne’ebe la hanesan no ita nia riku soin ne’ebe la hanesan kapasidae atu sai ida deit. Ita tenke husu grasa ida ne’e ba Espirito Santo, husu ba Nia atu prezente nafatin iha komunidade, iha fatin ne’ebe ita servisu atu nia bele kria fuan ida ne’ebe iha hakarak atu sai ida deit. Tan ne’e wainhira hau rona liafuan ne’e halo hau hanoin fali ba orasaun ne’ebe Amo Papa Paulo VI hakerek, nia reza hodi remata ninia homilia iha1970. Nia dehan hanesan ne’e: ‘ Mai Espirito Santo no haraik mai ami fuan bo’ot, nakloke ba ita nia liafuan kbi’it wain no taka fuan ne’ebe taka ba ambisaun hotu, fuan bo’ot atu hadomi ema hotu, servi ema hotu hamutuk ho sira hotu ne’ebe terus. Fuan bo’ot ne’ebe metin atu enfrenta tentasaun oin-oin, koko oi-oin, kole oi-oin, dezilizaun oi-oin, ofensa oi-oin. Fuan ida ne’ebe hatene tuku hamutuk ho Jesus nia Fuan no hatene halo ho haraik-an no fidelidade Maromak Nia hakarak. Ohin ita hanoin ba Nain Feto, Nia mak  ema ida iha fuan hanesan ne’e. ida ne’e balu dehan templu Espirito Santo Nian, balun dehan Espirito Santo Nia Kaben, naran nia mak realiza buat ne’ebe orasaun ida ne’e husu. Tan ne’e Amo Papa Francisco komesa tinan rua liu ba nia husu atu Segunda Feira depois de Pentecoste Selebra Memoria Nain Feto Inan Kreda Nian. Tamba Amo Papa dehan Nia iha kbi’it atu krea iha Kreda laran Fuan ida deit no hanoin ida deit. Nia mak ida ne’ebe tulun Eskolante sira atu ba oin depois de Jesus sae ba Lalehan, nia mak kontinua hametin iha Kreda sentimentu  ida ne’e. ohin ita husu Espírito Santo atu akompña nafatin ita, aban  ita husu NainFeto atu bele realiza buat ne’ebe Espírito Santo sujere mai ita. BOA noite”.

Ami nia fuan nakonu ho gratidaun Ba prezensa Espírito Santo nian, Ba Nain Feto ne’ebe akompaña ami, ba Madre Provincial ho nia liafuan murak sira, ba Irman sira husi komiunidade B. Eusebia ne’ebe iha inisiativa furak ba prosesaun ida ne’e no ba unidade, kolaborasaun, laran manas husi Irman no menina sira hotu ne’ebe halo loron ikus fulan ida ne’e nian no naroman loron nian nia ikus nian ba ho esperiensia orasaun ne’ebe ne’ebe nakonu ho grasa. Amen. Obrigada barak.

Noemia de Deus, FMA.